New Delhi, Rymphang:
Hadien ba ka kompani TATA Group ka lah ioh ia ka hok na ka bynta ban pynpaw ialade shakhmat ha kiba bun ki bynta bad ki lad jingiarap bad jingkyrshan ki jong ka ha ka lympung ialehkai Indian Premier League (IPL) jong ki shynrang, kumjuh ruh mynta ka sien katei ka kompani ka lah ioh ruh sa ia ka hok na ka bynta ka lympung ialehkai ba nyngkong eh jong ki kythei ka Women’s Premier League (WPL).
Kumta na ka liang jong ka BCCI ka pynbna ia ka jingdie ia ki hok na ka bynta ka tei ka lympung ialehkai bad ka TATA ka lah ioh ia ka hok ha ka ban pyniaid ia ki jingialehkai baroh katkum ka jingkyrshan lem ka jong ka. Ia ka jingiamynjur hapdeng ka BCCI bad ka TATA lah iasoi na ka bynta ki 5 snem ba nyngkong jong katei ka lympung ialehkai. Ka TATA ka long kawei na ki karkhana heh saipan jong ka ri India, bad katei ka hok ba ka lah ioh mynta ka long hadien ka jingpynseisoh ka jong ka ia ka lympung ialehkai jong ki shynrang kaba lah dep long ka IPL.
Kumta ka Tata & Sons ka lah shim ia ka jaka bad mih bujli ha ka jaka jong ka kompani kaba pawnam na China ka Vivo. Shuh shuh ruh ka Title Sponsorship bad ka jingiateh na ka bynta ban pyllait paidbah ia ki jingialehkai bad ka Viacom lah dep ban pynlong ia ka WPL kum kawei na ki kynhun kaba heh tam ha katei ka lympung ialehkai T20.
Haduh mynta ka Tata Motors ka lah iaineh kum ka nongkyrshan ba radbah ha ka IPL ha ki aiom ialehkai ba lah dep, ha ryngkat bad ka Super Striker Award, ryngkat bad ki kali jong ka kum ka Tata Nexon, Tata Harrier bad Tata Punch kiba katei ka kompani ka wanrah shakhmat kum ki thong hakhmat ki nongialehkai jong ka lympung.
Ka khubor ka iathuh ruh ba ka BCCI ka die ia ki san kynhun ialehkai na ka bynta ka jingkynthuplang ia ka song pisa kaba lah kot sha ka 4670 klur; ha shuwa ka 951 klur ka jingiateh jong ka bad ka Viacom18.
