Shillong, Rymphang 27:
Ki saw tylli ki kynhun ïalehkai kiba kynthup ïa ka Meghalaya, Punjab, Services bad ka Karnataka ki la poi ha Riyadh kaba ha Saudi Arabia na ka bynta ban pynkhreh ïa ki jingïakhun semi final jong ka Santosh Trophy.
Kine ki kynhun ïalehkai ki la pynkhreh bha na ka bynta ban kynjoh sha ka thong bad ban pynsah kynmaw ha ka kam ïalehkai jong kane ka lympung.
Ïa kine ki jingïakhun semi yn pynlong ha ka 1 tarik u Lber ha King Fahd International Stadium kaba ha Riyadh ha kaba ka Meghalaya kan ïakhun pyrshah ïa ka Punjab ha ka por 5:30 janmiet, katba ka Services kan ïakynduh pyrshah ïa ka Karnataka ha ka por 9 baje mynmiet.
Kia r tylli ki kynhun ki ban mad ïa ka jingshah rem kin ïaknieh ïa ka kyrda balai (3rd Place) ha King Fahd International Stadium ha ka 4 tarik u Lber ha ka por 6 baje, katba ïa ka final yn pynlong ha kajuh hi ka sngi ha ka por 9 baje mynmiet.
U coach ka kynhun ïalehkai ka Jylla u Khlaiñ Pyrkhat Syiemlieh u la pynpaw, “Ka long kaba sngewkmen eh ban ïoh ïalehkai ha kane ka ri. Te kumta baroh ki rangïalehkai ki la thrang eh ban sdang noh ka jingïakhun semi final. Kum u coach nga ïohi ba ki rangïalehkai ki la sdang ban ïoh ïa ki buit ïalehkai kiba thymmai.”
Kumjuh u coach ka Punjab u Harpreet Saini u la ong ba kane ka lympung kan long kum u mawjam ba kham kyrpang na ka bynta ban kyntiew ïa ki rangïalehkai. “Baroh ki rangïalehkai ki la kmen eh haba ki poi ha Riyadh bad ruh ban ïashim bynta ha ka Hero Santosh Trophy. Kumta mynta ka la dei ka por ban pynleit jingmut na ka bynta katei ka jingïakhun bad ruh ban ïalehkai bha.”
U coach ka Services u MG Ramachandran u la pynpaw hadien ba ka kynhun ka la ïuhkjat ha Riyad, “Baroh ki rangïalehkai ka kynhun ki la sngewkmen eh ban ïadon bynta ha kane ka lympung. Ngi la long ba la pynkhreh haba ngi wan ha kane ka jaka ban ïakhun ïa ka semi-finals bad ka jingangnud jong ka kynhun ka long ban khur ïa ka nam lahduh namar yn sa ngi leit phai sha la ïing kan long ryngkat bad ka trophy.”
Ha kawei pat ka liang u Coach ka Karnataka u Ravi Babu Raju u la ong, “Kane ka long kaba lympung ïalehkai kaba kongsan eh bad ngi sngewkmen haba ngi ïoh ban poi sha kane ka jaka. Ka long ka sien kaba nyngkong eh ia ka kynhun ban ïoh ïalehkai ïa ka Santosh Trophy shabar ri bad ngi khmih lynti ban kynjoh sha ka thong. Ïa mynta ngin hap ban pynleit jingmut bha na ka bynta kane ka jingïakhun.”
Kum ban shu pynmaw ha ki jingïakhun jong ka wat kaba khatduh (final round), ka Meghalaya ka la mad ïa ka jingshah rem da 2-0 kol ha ka Services, kaba la lamkhmat ha ka Group-B da kaba kamai 13 point na ki san sien ïakhun. Hynrei hadien ka Meghalaya ka la wanphai da ka jingjop ïa ka Manipur (1-0 kol), ka la ïakhaid bad ka Railways (0-0) hashwa ba kan pynliem ïa ka Delhi da 5-1 kol bad ïa ka West Bengal (2-1 kol) na ka bynta ban kynjoh sha ka kyrdan ba-ar da kaba kamai 10 point.
Haba phai sha ka Group-A, ka Punjab kaba la ïoh ban lamkhmat da kaba kamai 11 dor-thong bad ka Karnataka kaba wan ba-ar ka la kamai 9 dor-thong.
