Wellington, Rymphang:
U Kane Williamson kum u rangialehkai Kriket ka New Zealand u la lah mynta ha ka ban tam noh shakhmat ia ka rekod jong u Ross Taylor, na ka bynta ban pynlong ialade uwei na ki nongialehkai Test ka New Zealand ban kiew sha ka kyrdan ba shajrong ha ka jinglah ban kamai bun run eh ha katei ka lympung.
Shuh shuh ki spah ron kiba lah kamai da utei u rang-ialehkai ki lah ialam ruh ia ka kynhun jong ka New Zealand baroh kawei ha katei ka jingiakhun sha ka 483 ron ha ryngkat ka jingshah pynhap lut baroh ki nongtied ha ka innings ba ar bad buh ruh ia ka kynhun iakhun pyrshah ka England ia ki 258 ron ba kan lah kamai na ka bynta ban rah ia ka jingjop ha katei ka jingiakhun. Kumta ruh utei u rangialehkai uba long ruh u kapten barim ka NZ u ioh ia ka jingshah iaroh kaba arsien da kaba shu ieng ha ka Basin Reserve ha ka por ba u la lah ban ialehkai bha ha ki innings kiba lah wanlam sha u ia ka jingkamai spah ron tam kaba 26 ha ka jingialehkai Test ha ka jingim jong u. Kumta ruh itei u rangialehkai u lah rah ia ka jingtied jong u shajrong hadien ba u lah kynjoh sha ka 29 khlem pat shah pynliem na ka bynta ban pynpra noh ia ka rekod jong u Taylor kaba da 7,683 ron. Kumjuh ruh u Stephen Fleming uba long ruh u kapten barim jong ka kynhun u shong ha ka kyrdan balai na ki 7,172 ron kiba u lah kamai.
Ka khubor ka iathuh ruh ba u Williamson u lah kynjoh mynta sha utei u mawjam ha ka jingialehkai Test kaba 92 bad ha ki 161 tylli ki innings ia kaba lah niew kum uba kloi tam ban ia ki 112 tylli ki jingiakhun Test u Taylor bad ki 196 sien mih madan ki jong u ha ki jingiakhun.
