New Delhi, Rymphang:
Namar ka jingseisoh ha ka jingshimbynta ha ki lympung ialehkai Kriket jong une u snem ba mynta da ka kynhun ialehkai Kriket jong ki kynthei ka ri, ka khubor ka iathuh ba katei ka kynhun ka la pyndep mynta ialade hapoh ka thup ba lai ha ka group ha ka lympung Women’s T20 World Cup ha South Africa bad ka long kaba phra napdeng kiwei pat ki kynhun ialehkai kaba lah shu shah jied kumto na ka bynta ban mih madan sa ha ka bynta ban wan jong katei ka lympung ka ban sa long pat ha u snem 2024 ha Bangladesh.
Shuh shuh ruh ka khubor ka iathuh ba ki lai kynhun ialehkai kiba wan shakhmat na man la ki ar group jong ka lympung ialehkai World Cup; da kaba suk ki lah ioh ban rung sha katei ka lympung iakhun ka ban sa long pat lem bad ka Bangladesh ka ban sa pynlong ia ka lympung ialehkai bad ka Pakistan kaba bat ia kyrdan ba hakhliehduh shabar jong ka thup ba 6 kaba lah ioh ba rung beit sha ka lympung. Kumjuh ruh ka Australia, New Zealand bad South Africa ki long ki kynhun kiba lah shah jied na ka Group 1, katba ka England, India bad West Indies pat ki long na ka Group 2.
Hynrei ka long pat ka jingduhnong kaba khraw na ka bynta kiwei pat ki ar kynhun ialehkai kata ka Sri Lanka bad Ireland kiba long tang ma ki napdeng ki kynhun ki bym shym la lah ban shah jied na ka lympung ialehkai kaba dang shu dep long shen ka T20 World Cup. Watla ka Sri Lanka haduh mynta ka shong ha ka kyrdan ba phra ha ka thup bad ka Ireland ha ka kyrdan ba 10, hynrei ki shem jingeh pat na ka bynta ban ioh rung da kaba suk sha ka tei ka lympung ban sa long ha u 2024.
