Shillong, Rymphang 28:
Ka lympung ïalehkai 2nd District League T20 Cricket Tournament 2023 ba la pynïaid da ka East Khasi Hills Cricket Association ka la nangjam shaphrang ha kaba ka Cricket Lovers bad ka Laitjem CC ki la khur ïa ka jingjop ha ka sngi Ba-ar.
Ha kane ka jingïakhun kaba la long ha madan Polo, ka Cricket Lovers ka la pynliem noh ïa ka Cricket Smit da 6 wiket. Ka Cricket Smit ka la kam trai ban tied nyngkong ha kaba ka la kamai 129 run bad shah pynkhyllem 5 wiket ha ki 20 over. U Banshanlang Nongdhar u la tied 35 run na ki 21 bol. Katba u Raj Kishor Yadav u la khur 2 wiket na ka bynta ka Cricket Lovers.
Haba wan shimti ïa ka pali ba ar, ka Cricket Lovers ka la kynjoh sha ka thong da kaba ïoh 132 run bad shah pynkhyllem 4 wiket ha ki 18.2 over. U Rohit Yadav u la ioh ban khyrwit ïa ka shiteng spah kaba 60 run na ki 54 bol bad u Prem Lama u la tied 43 run na ki 26 bol. Katba u Elsabat Nongdhar u la khur 2 wiket na ka bynta ka Cricket Smit. Ïa ka nam ‘Player of the Match’ la khur da u Rohit Yadav.
Haba phai sha kawei pat ka jingïakhun ba ar, ka Laitjem CC ka la jop da 65 run ïa ka Thynroit SCC. Ka Laitjem kaba la kam trai ban tied nyngkong, ka la ïoh 153 run bad shah pynkhyllem 6 wiket ha ki 20 over. U Poilangson Thawmuit u la ïoh ban khyrwit ïa ka shiteng spah kaba 51 run na ki 28 bol. Katba u Orsric Herbert Wanswett u la khur 1 wiket na ka bynta ka Thynroit.
Haba wan beh ïa ka thong, ki nongtied ka Thynroit ki la shah pynkhyllem baroh bad ïoh tang 88 run ha ki 17.4 over. U Aleric Wanswet u la tied 37 run na ki 36 bol. Katba u Doril June Pathaw u la khur 2 wiket na ka bynta ka Laitjem. Ïa ka nam ‘Player of the Match’ la khur da u Poilangson Thawmuit.
