Lens, Rymphang:
Na ka prokram sam khusnam ba lah pyniaid da ka FIFA na ka bynta ki khlur ialehkai phutbol na ki klob bad ki kynhun jong ki ri bapher bapher ia kaba lah tip kum ka ‘The Best’ kaba lah long ha nongbah Paris, ka khubor ba la ioh lum ka iathuh ba u kapten jong ka kynhun ialehkai ka Argentina u Lionel Messi u lah long u nongjop bad u lahduh napdeng ki shynrang ban khur ia katei ka khusnam, kata ha kaba la kyrshan ia u da ka jingjop ba ka kynhun ka la ioh ban rah na ka WC 2022.
Ha katei ka jingiaknieh ia ka khusnam, u Messi u la lah ban pynliem noh ia u rangialehkai uba ialehkai lang na kajuh ka klob; Paris Saint-Germain u Kylian Mbappe bad ia u Karim Benzema kiba long kiwei pat ki kyrtong iakhun kiba iaknieh ia ka khusnam mynta u snem.
Ka long ruh ka sien kaba ar ha kaba u Messi u lah ioh ban rah biang sa shisien ia katei ka nam bad ha kaba nyngkongeh ka long ha ka sngi ba lah plie paidbah ia ka jingsam ia ka tei ka khusnam da ka FIFA kata u snem 2016.
Kumta ruh utei u rangialehkai uba la lah ban khur haduh hynniew sien kum u lahduh ka Ballon d’Or, u lah ioh mynta ban pynliem noh ia u Robert Lewandowski ka Poland uba lah khur teng ia ka tei ka khusnam.
Shuh shuh ruh ka khubor ka iathuh ba napdeng ki kynthei ba lah rah ia katei ka khusnam mynta u snem ka long ka nongialehkai na Spain ka Alexia Putellas; kaba lah iai bat biang mynta halade ia ka khusnam.
Ka Alexia mynta ka kynti ka la lah ha ka ban pynliem noh ia ka nongshut bol ba pawnam ka England; ka kynhun kaba lah rah ia ka thong jingjop ha ka European Championship ka Beth Mead bad ia ka nongialehkai ba paw ka USA ka Alex Morgan na ka bynta ban iai pyndap khusnam FIFA shuh shuh halade nalor ka Ballon d’Or ba ka lah dep ban khur. Kumba ka long mynta ka Putellas ka dang don hapdeng ka jingiaid lynti ban ioh noh ia ka jingkoit na ka jingmynsaw ka jong ka ba ka lah ngat naduh u Naitung.
Ka thup kyrteng jong ki nongkhur ia ki khusnam bapher bapher ha ka prokram:
Argentina – FIFA Fan Award 2022
Luka Lochoshvili – FIFA Fair Play Award
Lionel Scaloni – FIFA Men’s Coach 2022
Sarina Wiegman – FIFA Women’s Coach 2022
Marcin Oleksy – The FIFA Puskas Award (best goal)
Emiliano Martinez – FIFA Men’s Goalkeeper Award 2022
Mary Earps – FIFA Women’s Goalkeeper 2022
