Spain, Lber:
Katkum ka khubor ba la ioh lum ka iathuh ba u khlur ialehkai Tennis ka ri Spain u Rafael Nadal un sa duh noh mynta ka kynti ban shim bynta ha ka ATP 1000 ka Indian Wells bad ruh ha ka Miami Open.
Katei ka khubor ka mih hadien ba utei u khlur ialehkai u lah dep ban pynbna ha ki tarik ba shadien jong u K’lyngkot ba u lah ban duh ialehkai kumba hynriew haduh phra taiew eiei na ka daw jong ka jingshitom ha ka met kaba u la ioh naduh ka Australian Open.
Kata ka pynpaw ruh na ka bynta ka aiom ialehkai ha ka dewbyrtha ka ban sa sdang ha mar shiteng jong u bnai Iaiong bad ban lam ruh sha Roland Garros; ha kaba u Nadal un iakhun na ka bynta ban rah ia ka thong jingjop kaba 15 jong ka French Open ha u bnai Jymmang.
U Nadal uba la lah ruh ban thaw ia ka histori da kaba pynlong ialade uba nyngkong tam eh napdeng ki nongialehkai ban rah ia ka jingjop Grand Slam ba 21 ha ka Australian Open 2022, hynrei uba lah kynran-dien noh na katei kajuh ka lympung ialehkai jong une u snem ba mynta hadien ba u lah shimbynta tang ha ki ar tylli ki jingialehkai.
Ha u snem ba lah dep u long u ba khlem shah pynrem ha ka jingiaid lynti ka jong u ha ka Indian Wells. U long ruh u rangialehkai uba lah khur ia ka thong jingjop ha ka ATP tournament ha Acapulco bad rung ruh sha ka phainal ha ka Indian Wells; ha kaba u lah mad ia ka jingshah pynliem noh ha u rangiakhun pyrshah ka ri USA u Taylor Fritz ha ka phainal.
