Buenos Aires, Lber:
Katkum ka khubor ba la pynbna da ka Argentine Football Federation ka ong ba u nongpyniaid ba ha khliehduh jong ka kynhun iakynjatbol ka Argentina; kaba lah rah ruh ia ka nam kum ka lahduh ha ka FIFA World Cup 2022 ha Qatar u Lionel Scaloni, u lah soi biang mynta ia ka jingiateh kontrak kaba thymmai bad ka kynhun ha kaba utei u nongpyniaid un dang iaisah bad ka kynhun baroh kawei haduh ka lympung World Cup ka ban sa long pat ha u 2026.
Ka khubor ka iathuh ruh ba u Lionel Scaloni uba lah shimti ia ka kynhun kum u nongpyniaid ha u snem 2018 bad uba lah btin lynti ruh ia ka kynhun ialehkai baroh kawei hapoh ka jingialam jong u Lionel Messi kum u kapten sha ka nam bad ka burom bakhraw ha ka pyrthei ha kaba ka kynhun ka lah rah ia ka trophy na katei ka lympung ialehkai kaba lah sdang naduh u Naiwieng haduh u bnai Nohprah jong u snem ba lah leit noh, u lah pdiang mynta ia ka tei ka jingiateh kaba thymmai katba u dang leit ban shimbyntalang ha ka prokram sam khusmnam kaba lah long ha nongbah Paris ka ‘FIFA Best’.
Kum u riew rangbah uba lah ih bha ka rta jong u, u Scaloni u lah btin lynti ia ka kynhun sha ka thong jingjop bad kum ka lahduh ha ka Copa America 2021 kaba long ruh ka trophy bar-ri kaba nyngkong ba ka kynhun baroh kawei ka lah ioh ban rah naduh u snem 1993.
Hadien kata u lah iai sei ia ka sap jingpyniaid ba tbit ka jong u sha ka kynhun tad haduh ba kan da lah ban rah ia ka trophy jingjop kaba lai ha ka World Cup 2022 hadien ka jingiashut tie-breaker ha ka jingiakynduh phainal bad ka France ha Doha. U Lionel u lah shimti ia katei ka kam ha ka kynhun ialehkai na u Jorge Sampaoli hadien ba ka kynhun ka lah shah pynliem noh ha ka pre-quarterfinal jong ka World Cup 2018 ha Russia; ha kaba u Scaloni u lah long tang kum u nongpyniaid ba shipor ka kynhun bad ha shuwa ba un ioh ban pynskhem ialade ha ka kyrdan.
U Lionel Scaloni u lah btin lynti ruh ia ka kynhun baroh kawei sha ki 36 tylli ki jingialehkai khlem shah pynliem shisien ruh ha ka jingiaid lynti ka jong ka ha ka World Cup 2022, kaba long ruh ka jingiai pruid dak jong ka kynhun ia ka jingiaid lynti jong ka ha ka 2021 Copa America haduh ba kan da rah syndon ia ka thong jingjop ha Brazil.
Kumta wat hadien ka jingiasoi biang ka jong u mynta bad ka kynhun ialehkai baroh kawei, ka khubor ka iathuh ba ka Argentina hapoh ka jingialam biang ka jong u sa shisien pat kan iai iada ia katei ka nam bad ka burom ba ka lah khur na ka World Cup 2022 wat sa ha ka WC 2026 ka ban sa long ha ka jingiasnohktilang jong lai tylli ki ri ki ban pynlong ia ka lympung kata ka Mexico, United States bad Canada.
