Hyderabad, Lber:
Uwei na ki nongkawang bol ba la rim bad pawnam bha jong ka kynhun ialehkai Kriket ka ri u Ravichandran Ashwin, u la kiew mynta sha ka kyrdan ba ha khlieh duh jong ka thup kyrdan thymmai ka ICC ha kaba iadei bad ki nongkawang bol ha ka jingialehkai Test.
Kumta ha kaba iadei bad katei ka bynta, u Ashwin mynta ka sien u lah ioh ban knieh noh ia ka kyrdan jong u rangkawang bol ba paw ka England u James Anderson uba lah bat baroh shi katta ia katei ka kyrdan. Ka khubor ka iathuh ruh ba u Ashwin uba lah ioh mynta ban kiew sha katei ka kyrdan ha ka thup ka long hadien ka jinglah jong u ban khur ia ki 6 wiket ha ka jingialehkai ba ka kynhun ka lah rah ia ka thong jingjop pyrshah ia ka Australia ha ka jingiakhun Test kaba ar dang shen. Kumta ruh da ka jingioh ka jong u ban kiew sha katei ka kyrdan, ka lah pynlong ruh ia u Anderson ban shah pynhiar mynta sha ka kyrdan ba 2 hadien ba ka kynhun ialehkai ka jong u ka lah mad ia ka jingshah pynliem ba kyndit ha ka New Zealand ha ka jingiakhun Test ha Wellington. Shuh shuh ruh ka khubor ka iathuh ba u Ashwin u lah ioh ban khur nyngkongeh ia katei ka kyrdan napdeng ki nongkawang bol ha ka jingialehkai Test ka long ha u snem 2015 bad uba lah ioh ban wanphai biang sha katei kajuh ka kyrdan ha kiba bun ki lympung ialehkai naduh kata ka por haduh mynta. U Ashwin u don ruh ia ka lad ka kabu ksiar na ka bynta ban nang iai pynjrong shuh shuh ia ka jingbat jong u ia katei ka kyrdan ha ka jingiaisah ka kynhun ia ki ar jingiakhun ki ban long ha-iing ha ka lympung ialehkai kaba dang iaid shakhmat mynta ka Border-Gavaskar Trophy. U long ruh uba lai ha ka jingbat ia ka tei ka kyrdan ha kiba bun tylli ki taiew, hadien ba u Anderson u lah mih bujli noh ha ka jaka jong u kapten ka Aus u Pat Cummins ha ka tei ka kyrdan ha ka kylla iaknieh kyrdan kaba lah dep. Kumta ruh u Anderson u don mynta ia ki 5 dor-thong hadien u Ashwin uba dang iaisah da 864 dor-thong.
Shuh shuh ruh ki 10 wiket jong u Jadeja kiba u lah khur na ka jingiakhun kaba ar pyrshah ia ka Australia, ki pynlong ia u mynta ban kiew sha ka thup kyrdan ba phra. Ma u lem bad u Ashwin ki bat ia ki ar kyrdan ba shakhmat ha ka thup ki ‘All-Rounders’ jong ka jingialehkai Test. Kumjuh ruh u Joe Root u long uwei pat uba lah jam shakhmat mynta ha ka thup All-Rounders kata da ar jaka sha ka kyrdan ba 8. Katba u Marnus Labuschagne bad Steve Smith ki iaisah ha ka kyrdan ba 1 bad ba 2 napdeng ki nongtied ha ka Test. Kumjuh ruh u Tom Blundell ka NZ u rung sha ka thup ba 10 da kaba kiew da saw jaka sha ka kyrdan ba 7 hadien ba u la lah ban iarap ia ka kynhun ban iai bteng ia ka jingkhur jingjop da 1 ron ha ka jingiakhun Test ba-ar bad ka England.
