Austin, Lber:
U khlur ialehkai Tennis ba pawnam ka ri Spain u Carlos Alcaraz u la weng noh ialade ban shimbynta ha ka ATP 500 tournament ha Acapulco kaba la nang iaid shakhmat mynta na ka daw ka jingshitom jur ha ka kti-kamon.
Shuh shuh ruh nalor jong u, ka khubor ka iathuh ruh ba u Cameron Norrie ruh u lah kynran-dien noh na katei ka lympung ialehkai na ki katto katne ki daw.
Kumba ka long, baroh arngut ki lah shah pynbeit prokram ialehkai ba kin iakhun para maki, hadien ba u Norrie u lah iai pynher shakhmat na ka bynta ban pynliem noh ia u Alcaraz da 5-6, 6-4, 7-5 ha ka jingiakhun jong ki ha ka phainal jong ka Rio Open.
U Carlos uba lah wanphai sha ka kam ialehkai da ka jingjop ka jong u ha Buenos Aires dang ha ka taiew ba la lah, da kaba pynkut noh ia ka jinghap ban iehnoh ia ka kam ialehkai ka jong u lah saw bnai kynthih. Kumjuh ruh u Norrie uba lah shah pynliem noh ha u Carlos Alcaraz ha ka jingiakhun phainal ha Buenos Aires, u la lah pat ban khur ia ka jingjop kaba khraw shalade ha ka Rio Open.
Ka khubor ka iathuh ruh ba ha ka jaka jong kitei ki rangialehkai yn sa pynmih bujli ha ka jingpyniakab da kiwei pat ki nongialehkai ki bym pat da pawkhmat bha; ha kaba kitei ki arngut ki phaikhmat mynta ban ioh ia ka met kaba koi tba khiah na ka bynta ka lympung ialehkai kaba pawnam ka ATP 1000 ha Indian Wells ka ban sa sdang ha ka 8 tarik mynta u bnai.
