Shillong, Lber 03:
Ka kynhun ïalehkai ka Jylla ka long ba la khreh ban ïakhun pyrshah ïa ka Karnataka ha ka jingïakhun final jong ka Santosh Trophy ha ka sngi Saitjaiñ ha King Fahd International Stadium kaba ha Riyadh, Saudi Arabia.
Kane ka long ka sien kaba nyngkong eh ïa ka Meghalaya ban ïoh rung sha ka final bad ruh ban ïaknieh ïa ka nam lahduh ha kane ka lympung, katba ka Karnataka ka la ïoh rung ha ka sien ba ar naduh ba ïoh rung teng ka aïom ïalehkai 1975-76.
Ha kajuh ka por kane ka lympung kan dei ka sien kaba nyngkong eh ba ka All India Football Federation (AIFF) ka la pynlong ïa ki jingïakhun final, third place bad final shabar ri.
U coach ka Meghalaya u Bah Khlaiñ Pyrkhat Syiemlieh u la pynpaw ïa ka jingsngewkmen eh ba ki rangïalehkai ki la lah ban pynurlong ban jam sha kane ka kyrdan bad ki long ba la khreh ban ïaknieh ïa ka nam lahduh ha ka Santosh Trophy. Wat la kane ka kynhun ka la don hapdeng ka jingduh jingkyrmen, hynrei ki rangïalehkai na Garo bad Khasi Hills ki la ïakhun tyngeh naduh kaba sdang.
“Naduh ka jingïakhun jong ka jingïalehkai group, ka kynhun jong ngi ka la wanphai da ka jingkhlaiñ bor. Ngi la shah rem da 1-2 kol ha ka Odisha ha ka jingïalehkai group bad lada ngi dang shah rem ngin ym lah ban ïoh rung. Hadien ngi la shah rem ha ka West Bengal bad hadien ha ka Punjab, hynrei ki rangïalehkai ki don ïa ka mynsiem ïakhun,” u la bynrap.
“Ngi tip bha ba ka Karnataka ka long ka kynhun kaba khlaiñ bad kaba don ïa ki rangïalehkai kiba kynsai kiba la ïalehkai na ki klob bapher bapher bad ki klob (reserve team) jong ka ISL. Hynrei ngim don jingtieng. Ki rangïalehkai ki tip kumno ban ïalehkai bad ngin ïai neh skhem halor kane ka rukom ïalehkai,” la ong u Khlaiñ.
Utei u coach u la ai khublei ïa ki paidbah nongkyrshan ka Jylla bad u la kyntu ïa ki ba kin ïai bteng ban ai jingkyrshan pura haduh kane ka jingïakhun final.
“Ki khubor kiba ngi la ïoh lyngba ki mobile phone ki la shlei sa tang ki jingai khublei. Wat ha ki rynsan social media, ngi la ïoh ki jingai khublei lyngba ki paidbah. “Man la iwei-pa-iwei ki dap da ka jingsngewkmen halor ka jingïalehkai bha ki rangïalehkai bad ki la ai jingkyrshan na ka bynta jong ngi. Kumta ngi donkam ban ïakhun tyngeh namar ngi thrang ban ïoh rah ïa ka trophy.”
U kapten kane ka kynhun u Brolington Warlarpih u la ïasoh bad kane ka kynhun naduh ka wat kaba khatduh, hadien ba um shym la ïashim bynta lang ha ki jingïalehkai group na ka daw ba u kwah ban pynlut por bad la kiba haïing hasem ha ka jingrakhe ïa ka khristmas ha u Nohprah jong u snem ba la dep.
Utei u rangïalehkai ba la 34 snem ka rta u la pynpaw, “Kane ka long ka kabu ksiar kaba khatduh kaba ngan ïakhun tyngeh namar ngan sa shongthait noh na ka kam ïalehkai. Ngan ïaleh ban pynurlong na ka bynta ban kynjoh sha ka thong jong ka jingjop.”
Ha kawei pat ka liang u coach ka Karnataka u Ravi Babu Raju u la ai jingïaroh halor kane ka jingpynkylla ïa kane ka lympung ïalehkai namar ka dei ka jingïohi jngai da ka AIFF.
“Kane ka jingpynkylla thymmai ïa ka rukom ïalehkai ka la long ka jingïarap kaba khraw na ka bynta baroh ki kynhun bad kumjuh ruh ki rangïalehkai ba kin ïalehkai bha,” u la bynrap.
“Kum ka kynhun ngi donkam ban ïalehkai bha na ka bynta ban rah ïa ka trophy. Ngi la bishar thuh ïa ka rukom ïalehkai ka Meghalaya, hynrei ngi donkam ban ïalehkai bha.”
Kumba ka paw ha ka jingïakhun semi final, ka Meghalaya ka la lah ban pynliem ïa ka Punjab da 2-1 kol bad ka Karnataka ka la jop ïa ka Services da 3-1 kol.
