Shillong, Lber 03:
U rangïakura ka Jylla u Shanborlang Marbaniang un kiew rynsan ban ïakhun pyrshah ïa u Laishram Chinglemba Singh uba na Manipur ha ka Professional Boxing ka ban long mynta ka sngi Saitjaiñ ha Manipur.
Kine ar ngut ki rangïakura kin ïakhun ha ka Super Fly Weight jong ka 50.802kg na ka bynta ban khur ïa ka jingjop.
Ïa kane ka rynsan ïakura la pynlong da ka Manipur Professional Boxing Council (MPBC) kaba hap hapoh ka jingkhmih da ka Indian Boxing Council (IBC), kaba la ïasoh sha ka World Boxing Council (WBC).
U Shanborlang ba dang 24 snem ka rta, u dei u khun ba phra napdeng ki shiphew ngut ki khun jong ka Kong Siplinda Marbaniang ba sah ha Pdengshnong, Umlyngka, Upper Shillong.
Kane ka long ka sien ba lai ïa u Shanborlang ba un leit ïakhun ha ka Professional Boxing naduh ba u la khur jingjop ha ka Marine Pro Boxing Promotion 2022 kaba la long ha Mumbai bad ka Professional Boxing 2022 kaba la long ha Manipur.
Haba ïadei bad kane ka jingleit ïashim bynta, na ka liang ka Meghalaya Professional Boxing Council (MPBC) ka ai khublei kitbok ïa u Shanborlang u ban ïashim bynta ha katei ka rynsan.
“Ngi sngewkmen ba ngi la lah ban sei ïa uwei u rangïakura u ban leit ïashim bynta ha ka Professional Boxing ka ban long ha Manipur,” la pynpaw u Franky Momin, General Secretary ka MPBC.
“Ngi pynpaw ka jingsngewnguh ïa ka Kong Moralin Thangkhiew, kaba la ai sngewbha ïa ka jaka ban kilanmet ha kaba bun na ki khynnah ki la ïoh ban kilanmet ïalade man la ka step bad janmiet. Kumta ngi khmih lynti ba kin dang mih shuh shuh ki nongïakura kiba kynsai na kane ka thaiñ bad ruh na ka Jylla hi baroh kawei.”
U Franky u la ïathuh ba la seng ïa ka Meghalaya Professional Boxing Council ha ka 11 tarik u Risaw, 2022. “Mynta ngi dang sah sa tang ban pynrung kyrteng (register) namar ka jingwan ka ilekshon sha ka Ïingdorbar Thawaiñ ka Jylla bad ngi khmih lynti ban pyndep noh ha ki bnai ki ban wan.”
