Auckland, Lber:
Katkum ka khubor ba la ioh lum ka iathuh ba ka kynhun ialehkai Test jong ka New Zealand ka la pynbna paidbah ia ki kyrteng jong ki rangialehkai kiba kam shym la pynkylla satia na ka bynta ki ar jing-ialehkai Test ki ban wan pyrshah ia ka Sri Lanka. Kitei ki rangialehkai ki dei kiba dang shu dep shim bynta dangshen ha-la-iing ha ka jing-iakhun pyrshah ia ka England ha Wellington bad jop ruh da 1 ron ha ka jingiakhun ba-ar na ka bynta ban pyniakhaid jingjop da 1-1.
Shuh shuh ruh na ka liang jong ka New Zealand Cricket (NZC) ka pynbna mynta ia ki kyrteng jong ki 13 ngut ki dkhot ialehkai ka kynhun ki ban hap hapoh ka jingshah pyniaid ha u Tim Southee kum u kapten ka kynhun na ka bynta kitei ki jingiakhun ki ban sa long naduh ka 9 tarik u Lber. Hynrei ka NZC kam shym la jied satia ia u Jacob Duffy, leg-spinner Ish Sodhi bad Kyle Jamieson ban iadonlang bad ka kynhun.
Dang shen ka New Zealand ka lah kylla long ka kynhun ialehkai kaba saw ha ka khana-pateng jong katei ka jingialehkai ban rah ia ka jingjop hadien ba ka lah shah kyntu ban iai iaid shakhmat ka jingiakhun ha Wellington, ha kaba u Neil Wagner u lah khur wiket na u James Anderson na ka bynta ban ai ksai sha ka kynhun ban rah ia ka jingjop.
Shuh shuh ruh u kapten barim ka kynhun u Kane Williamson un iaisah kum u nongtied bahakhmat ka kynhun ryngkatlang bad u Tom Latham, Henry Nicholls, Devon Conway, Daryl Mitchell bad Will Young; katba u Tom Blundell un iai pyrto ia ka kam shakri ka jong u na ka bynta ban khur wiket katba ka kynhun ka dang iakhun pyrshah ia ka Sri Lanka.
Na ka liang jong ka NZC ka pynbna ruh ba ka kynhun ialehkai ka NZ kan ialehkai lai tylli ki jingialehkai T20Is pyrshah ia ka UAE ha u bnai Nailar ha ka jingiaid lynti ka jong ka na ka bynta ban iakhun pyrshah ia ka England ha ka jngiakhun da ka bol ronglieh. Kan long ruh ka sien kaba ar ha kaba ka New Zealand kan ialehkai pyrshah ia ka UAE ha baroh kawei ka jingialehkai jong ka ha ka jingleit iakhun shabar-ri; kata hadien ka World Cup ODIs 1996 hadien kitei ki ar kynhun kaba lah long ha Faisalabad, Pakistan.
Ki jingialehkai baroh yn pynialehkai ha u bnai Nailar ha ka 17, 19 bad 20 tarik ryngkat bad ki madan pynialehkai ia kaba yn sa pynthikna ha ki sngi ban wan.
Ki rangialehkai ka New Zealand ki ban iakhun Test pyrshah ia ka Sri Lanka ki long:
Tim Southee (C), Tom Blundell (Wk), Michael Bracewell, Devon Conway, Matt Henry, Tom Latham, Daryl Mitchell, Blair Tickner, Neil Wagner, Scott Kuggeleijn, Henry Nicholls, Kane Williamson bad Will Young.
