Shillong, Lber 05:
Hapdeng ka jingïakhun kaba tyngeh, ka Megha-laya ka la shah liem noh ha ka final jong ka lympung 76th National Foot-ball Championship Santosh Trophy kaba la long hapoh ka King Fahd International Stadium ha Riyadh, Saudi Arabia.
Ha kane ka jingïaleh-kai final ka Meghalaya ka la shah liem noh da 3-2 kol ha ka jingïakhun pyrshah ïa ka Karnataka. Wat la ka Meghalaya ka la shah liem, hynrei ka la lah shisha pat ban wanrah ïa ka nam ka burom ïa ka jylla hi baroh kawei, hadien ba ka la thaw khana pateng (history) da kaba ïoh rung syndon sha ka final jong kane ka lympung ha ka sien kaba nyngkong.
La ïoh ban sakhi ba ka jingïakhun final ka la long kaba itynnad bha khamtam ka rukom ïalehkai na ki ‘rang jong ka Megha-laya kiba la lah shisha ban pynpaw ïa ka jingtbit ka jong ki, la ka long ha ka rukom bat bol ne rah bol ruh kumjuh, kaba la pynpaw shisha ba kim duna shuh ha ka rukom ïalehkai haba ïanujor bad kiwei ki jylla kiba paw ka ri.
Ha kane ka jingïaleh-kai, watla mar ïasdang ka Meghalaya ka la shah thep kol, hynrei kane kam shym la pynduh mynsiem satia ha kaba ki la ïakhun tyngeh hynrei bym thaw hi ka sngi ne ka bok, ha kaba kut ki la hap ban mad ïa ka nam rem hynrei ban jop pat ïa ka mynsiem jong ki nongshong shnong ka Megha-laya lyngba ka jingpynpaw ka mynsiem ïakhun ka jong ki.
Ha kane ka jingïaleh-kai ïa ka kol kaba nyngkong la thep da u Sunil Kumar tang ha ka minit kaba 2 na ka bynta ka Karnataka bad ha ka minit kaba 19 ka Meghalaya lyngba u Brolington Warlarpih ka la ïoh ban pynphai ïa ka shi kol lyngba ka penalty hynrei tang hadien khyndiat por, ka Karnataka ka la ïoh khyrwit ïa ka kol ba ar lyngba u Bekley Oram bad ha ka minit ba 42 u Robin Yadav u la khyrwit ïa ka kol kaba lai bad ban tam syndon da 3-1 kol haduh ba kut ka kylla step.
Haba bteng ïa ka kylla miet, ki ‘rangïalehkai ka Meghalaya ki la ïakhun tyngeh bad dei ha ka minit kaba 60 ba u Sheen Stevenson Sohktung u la thep ïa ka kol kaba ar, hynrei kane kam shym la biang namar ha kaba kut, ki la hap ban mad noh ïa ka nam rem da 3-2 kol.
Watla ka Meghalaya ka la shah liem ha ka final, hynrei u Rajat Paul Lyngdoh, uba dei u nongap kol jong ka, u la ïoh khur ïa ka nam kum u nongap kol ba tbit tam ne ‘Best Goalkeeper of the Championship’ bad ïa ka nam ‘Best Player of the Championship’ pat la ïoh da u Robin Yadav jong ka Karnataka.
Kane ka jingïoh jong ka Karnataka ïa ka nam lahduh ruh kan dei ha ka sien kaba nyngkong hadien 54 snem, kata naduh ba ka la rah ïa ka khusnam ha u snem 1968-69.
