Shillong, Lber 05:
Ka Hurdles Cricket Club kan ïakhun pyrshah ïa ka Laitjem Cricket Club ban knieh ïoh rah ïa ka nam lahduh jong ka lympung 2nd District League T20 Cricket Tournament 2023 ba la pynlong da ka East Khasi Hills Cricket Association ha madan Smit.
Ka Hurdles CC bad ka Laitjem CC ki la ïoh rung sha ka final jong kane ka lympung hadien ba ki la jop ha ka jingïakhun semi-final kaba la long ha ka sngi Saitjaiñ.
Haba phai sha ka jing-ïalehkai semi-final kaba nyngkong hapdeng ka Hurdles CC pyrshah ïa ka Nongdawah Cricket Club, ïa ka jingkynting pisa la jop da ka Hurdles CC kaba la kam trai ban tied nyngkong.
Ki nongtied ka Hurdles CC kiba la tied nyngkong ki la lah ban kamai 105 run na ki 18.2 tylli ki over bad hap lut baroh ki wiket. U Ricky Stone Nongbet marwei u la tied 29 run na ki 14 tylli ki bol bad u Nangkiewkupar Disiar u la tied 22 run na ki 29 tylli ki bol katba u Kyrmenskhem Nongpluh pat u la khur 3 wiket bad ai tang 13 run na ki 4 tylli ki over bad u Nangshai Nongpluh u la khur 2 wiket bad ai 21 run na ki 4 over.
Haba beh ïa kane ka thong, ka Nongdawah CC ka la lah ban kamai tang 69 run bad hap lut baroh ki wiket na ki 17.1 tylli ki over. Tang u Restingroy Sari marwei uba la tied haduh 31 run na ki 26 tylli ki bol katba u Ricky Stone Nongbet u la khur haduh 4 wiket na ki 3.1 over bad ban ai tang 2 run bad u Pynshaitbor Girodh u la khur 2 wiket bad ai tang 7 run na ki 3 tylli ki over.
Ka Hurdles CC ka la jop ïa kane ka jingïalehkai da 36 run bad ha kane ka jingïalehkai u Ricky Stone Nongbet u la khur ïa ka nam ‘Player of the Match’.
Ha kawei pat ka jing-ïalehkai, ka Laitjem CC kaba la tied nyngkong ka la lah ban kamai haduh 146 run na ki 20 tylli ki over bad duh noh 6 wiket. U Manchester Pathaw marwei u la tied haduh 54 run na ki 53 tylli ki bol bad u Marken B Khar-kongor u la tied 49 run na ki 42 tylli ki bol, katba u Md. Muksodul Chou-dhury u la khur 3 wiket bad ai 28 run na ki 4 over bad u Prem Lama u la khur 2 wiket bad ai 13 run na ki 4 over.
Haba beh ïa kane ka thong, ki nongtied ka Cricket Lovers Sohra CC ki la lah ban kamai tang 131 run na ki 19.3 tylli ki over bad hap lut baroh ki wiket. U Rohan Rai u la tied haduh 37 run na ki 35 tylli ki bol katba u Mukhramul H Sarkar u la tied 28 run na ki 44 tylli ki bol, katba u Doril June Pathaw u la khur 5 wiket bad ai 16 run na ki 3.3 over bad u Arnold Shadap u la khur 2 wiket bad ai 27 run na ki 4 over.
Ka Laitjem ka la jop ïa kane ka jingïalehkai da 15 run bad u Doril June Pathaw u la khur ïa ka nam ‘Player of the Match’.
