Shillong, Lber 06:
U rangïakura ka Jylla u Shanborlang Marbaniang u la ïakhaid biang sa shisien pat ha ka rynsan ïakura jong ka Professional Boxing ha Manipur.
Ha katei ka jingïakhun kaba la long ha ka sngi Saitjaiñ, kitei ar ngut ki la ïakhaid ha ka jingkamai dor-thong (point) kata da 48-48, 46-40, 48-48 ha ka kyrdan ïalehkai Super Fly Weight jong ka 50.802kg.
Lah ban pynkynmaw ba u Shanborlang u la ïakhaid ha ka rynsan ïakhun jong ka Marine Pro Boxing Promotion 2022 kaba la long ha Mumbai, hynrei u la khur jingjop pat ha ka Professional Boxing 2022 kaba la long ha Manipur.
Ïa kane ka rynsan ïakura la pynlong da ka Manipur Professional Boxing Council (MPBC) kaba hap hapoh ka jingkhmih da ka Indian Boxing Council (IBC), kaba la ïasoh sha ka World Boxing Council (WBC).
Kumba ka paw u Shanborlang u la long tang marwei u rangïakura ka Jylla uba la ïoh ïa ka lad ban mihkhmat na ka Meghalaya Professional Boxing Council (MPBC) kaba dang shu seng ha u snem ba la dep.
