Shillong, Lber 06:
Ka kynhun ïalehkai phutbol ka Jylla ka la wanphai sha la ïing ha ka Lah Sngi U Blei, hadien ba ka la lah ban ïalehkai bha ha ka Santosh Trophy kaba la kut ha ka sngi Saitjaiñ ha Riyadh kaba ha Saudi Arabia.
Kane ka long ka sien kaba nyngkong eh ba kane ka kynhun hapoh ka jingïalam u Khlaiñ Pyrkhat Syiemlieh ka la lah ban rung shaduh ka final. Watla ka la shah rem ha ka jingïakhun final ha ka Karnataka da 3-2 kol, hynrei ki la wanphai sha la ïing kum ki khlur ïalehkai ba kynsai.
Ha kane ka jingwanphai sha la ïing la pdiang burom da ka Federation of Khasi Jaiñtia and Garo People (FKJGP), Khasi Students’ Union (KSU) bad ka Hynñiewtrep Youths’ Council (HYC) naduh Jorabat, Umsning, Mawïong bad kumjuh ha Mawlai Petrol Pump.
Ha ka jingïalang kaba lyngkot ba la long ha Mawlai Petrol Pump, la ïadon lang u Bah Erik Nongkynrih Assistant Secretary KSU Central Body, Bah James Hitler Mawphniang Assistant Secretary, Bah Raymond Kharjana Education Secretary, Bah Dundee C Khongsit President (FKJGP), Bah Khrawkupar Nongsiej Chief Organising Secretary (FKJGP) ha ryngkat lang ki nongkitkam ka KSU bad FKJGP.
Haba ai jingkren ha kane ka sngi, u Bah Erik u la pynpaw ka jingsngewkmen ba ki rangïalehkai ka Jylla ki la lah ban ïalehkai bha ha ka Santosh Trophy naduh kaba sdang ka lympung ïaknieh (qualifying round), kumjuh ha ka wat ba khatduh (final round) bad wat haduh kaba kut. “Haba nga peit ïa ka rukom ïalehkai ki rangïalehkai ka Jylla jong ngi ka la kiew irat shakhmat ha ka rukom ïalehkai. Phim ïa duna shuh ha ka rukom ïalehkai bad kiwei pat ki jylla.”
“Ka jinglah ban poi shaduh ka final ka la long ka jingai mynsiem ïa kiwei pat ki khynnah ïalehkai kiba dangkhie dangsan jong ka jylla. Nga kyntu ba phin dang ïai trei shitom bad shisien ka sngi phin sa lah ban kynjoh sha ka thong,” u la bynrap.
Ha kawei pat ka liang u Bah Dundee u la ai jingïaroh ïa kane ka kynhun kaba la lah ban kynjoh sha ka thong. “Kum ka jaitbynriew ka dei ban don ïa ka mynsiem ka jingïatylli lang kawei la ka long ha ka kam ïalehkai ne ha kano-kano ka bynta namar ka jingïatylli ka wanrah ka jingjop.”
Lah ban pynkynmaw ha katei ka jingïakhun Final kaba la long ha ka Sngi Saitjaiñ, ki rangïalehkai ka Jylla ki la ïalehkai bha naduh kaba sdang bad ruh ban pynpaw ïa la ki sap ïalehkai. La sakhi ruh ïa kane ka jingïalehkai da ki paidbah ka Jylla lyngba ki Giant Screen kiba la pynïeng ha kylleng ka nongbah kumjuh ha ka thaiñ Ri Bhoi, West Khasi Hills bad ha kiwei ki jaka.
