Shillong, Lber 06:
Ka kynhun ïalehkai siat khnam ka Jylla ka la mih na ka nongbah ha ka Lah Sngi U Blei ban leit shim bynta ha ka 29th NTPC Senior Indian Round, 42nd NTPC Senior Recurve and 18th NTPC Senior Compound National Archery Championship ka ban long ha Ekatanagar kaba ha Gujarat.
Ha kane ka jingïakob ka ban sdang naduh 9 haduh 18 tarik mynta u bnai, ka Jylla hapoh ka lama jong ka Archery Association of Meghalaya (AAM) ka la phah tang ar tylli ki jingïalehkai, kita ha ka Indian Round bad ka Recurve.
Ha ka Indian Round ki la don saw ngut ki rangïalehkai kiba kynthup ïa u Manchua Pyrbor, Kirdhart Gurung, Marshal Pariong bad u Aiborlang Nongrum. Ïa kane ka kynhun la ïalam da u Coach u Sumit Kumar Chaudhuri.
Katba ka kynhun ïalehkai jong ka Recurve Division kan mih ha ka 9 tarik na kane ka nongbah. Kine kin kynthup ïa u Mukesh Tamang, Deonik A.D Marak, Phrangkupar Kharjarin, Hypormi Wanñiang bad ka Andrica Nongsiej. Ïa kane ka kynhun yn ïalam da u Besuta Vero kum u coach.
