Shillong, Lber 06:
Ka kynhun ïalehkai jong ka Laitjem C.C ka la rah ïa ka nam lahduh ha ka 2nd District League T20 Cricket Tournament 2023 ba la pynlong da ka East Khasi Hills Cricket Association hadien ba ka lah ban pynliem noh ïa ka Hurdles Cricket Club da 3 wiket ha madan ïalehkai jong ka Shortimai Syiem Stadium, Smit.
Ka Hurdles CC kaba la jop ïa ka jingkynting pisa, ka la kam trai shwa ban tied nyngkong ha kaba ka la lah ba kan kamai 105 run bad shah pynkhyllem baroh ki nongtied ha ka 19.3 over.
U Standy Stone Kharshandi u la lah ban kamai 31 run na ki 25 bol, katba u Arnold Shadap u la ïoh ban khur 4 wiket na ka bynta 20 run na ki 4 over bad bud sa u Mebanshan Kharsati uba la ïoh ban khur 2 wiket na ka bynta 12 run na ki 3.3 over.
Haba wan shimti ïa ka pali ba ar, ka Laitjem CC ka la lah ban kynjoh sha ka thong da kaba ïoh 106 run bad khyllem 7 wiket na ki 19.5 over. U Mebanshan Kharsati u la lamkhmat ïa ka kynhun ban kamai 26 run na ki 29 bol, katba na ka liang ki nongkawang bol jong ka Hurdles Cricket Club u Ricky Stone Nongbet u la ïoh ban khur 2 wiket na ka bynta 17 run na ki 4 over bad Nangkiewkupar Disiar u la ïoh 1 wiket na ka bynta 12 run na ki 4 over.
Ïa ka nam ‘player of the match’ la khur da u Mebanshan Kharsati na ka Laitjem bad ‘Player of the Tournament’ ka leit sha u Rickystone Nongbet na ka Hurdles.
