Hyderabad, Lber:
Katkum ka khubor ba lah ioh lum, ka iathuh ba uwei na ki khlur ialehkai Kriket ba pawnam ka ri India u Hardik Pandya; u lah kylla long mynta uba dang khynnah tam eh napdeng ki nongialehkai Kriket ha ka pyrthei ban kynjoh sha ka 25 million ngut ki nongbud (Followers) ha ka rynsan pathai (Instagram).
Shuh shuh ruh ha baroh shi lynter jong ki snem, u Hardik u lah paw kum uwei na ki nongialehkai ba don sap bha ha ka kam ialehkai kum uwei na ki nongshong shnong ka ri bad ka jingioh bun ka jong u mynta da ki nongbud bad kiba sngewtynnad ha ka ban iai bud ia u ka lah nang iai pynskhem shuh shuh ia kata ka jingieid ba ki paidbah na kylleng ka pyrthei ki don ia ka bynta ha ka ban ieid bad shaniah tylli met bad mynsiem ha u. Kaba kham sngewtynnad eh ka long ba u Hardik u lah ioh shibun tam eh ki nongbud ia u ha ka tei ka rynsan pathai ka juk ba mynta ban ia kiwei pat ki khlur ialehkai pawnam tam ha ka pyrthei kum u Rafael Nadal, Roger Federer, Max Verstappen bad Erling Haaland.
Ka jinglong ba iaineh skhem ka jong u bad ka jingiai iajan bad ka jingiai bud ia u ha kylleng ka rynsan pahthai ka lah ai lad ruh ia ki paidbah nongkyrshan ki jong u ba kin ithuh bad tip ia u ha ki ar bynta la ka long ha ka kam ialehkai ne shabar jong ka kam ialehkai ka jong u bad katei ka lah nang iai pynkhlain shuh shuh ia ka jingiadei kaba jan bad ki paidbah. Watla u long u rangialehkai ba dang tang ha ka rta ba 29 snem, u long ruh u dkhot ba lah kham rim jong ka kynhun ialehkai ka ri bad u nongialehkai Kriket uba lah pynshisha ialade ia ka kam ialehkai ha ki jingialehkai bar-ri bad kumjuh ruh ha ka IPL.
