Serbia, Lber:
Na ka liang ki nongpyniaid jong ka lympung ialehkai Tennis ha ka ri USA kaba la tip kum ka ATP/WTA Indian Wells Masters, ki iathuh ba u nongialehkai napdeng ki shynrang uba bat mynta ia ka kyrdan ba 1 ha ka pyrthei u Novak Djokovic ka ri Serbia u lah weng noh ialade na ka ban shimbynta ha katei ka lympung.
Ka jingweng noh ka jong u na ka lympung ialehkai kam shym la dei than eh kata ka kam, hynrei ha ka jingshisha ka long ba utei u nongialehkai u lah shah khang na ka ban rung sha katei ka ri ban shimbynta ha ka lympung ialehkai; naba kat haduh mynta u dang iaisah tang ma u napdeng kiwei pat ki nongialehkai u bym pat shym la ai satia ia ka tika Covid-19, hynrei uba lah pynher pat da ka jingthoh sha ki bor pyniaid bahalor jong katei ka ri na ka bynta ba kin ai ka jingbit kaba kyrpang ia u ban rung sha ka tei ka ri. Kumba ka paw hi ka long ba katei ka lympung ialehkai jong ki shynrang bad kynthei kan sdang noh shen ha California Desert bad ia kaba yn sa bud pat da kawei ka lympung ialehkai ka pawnam ka Miami Open; ha kaba u Djokovic mynta u khmih lynti ba u u lah ban duh ruh noh ia ka tei ka lympung ba hadien tad haduh ba ki bor pyniaid bahalor katei ka ri kin kylla noh ia ka jingthmu ha ka jingmut jingpyrkhat ka jong ki na ka bynta jong u.
Haduh mynta katei ka ri kam pat shym la shah ia kino kino ki briew ki bym pat ai ia ka injek ba kin rung sha ka ri, lem bad ka Transportation Security Administration dangshen ka lah pynpaw ba ka tei ka mat treikam ha ka ri kan ym kylla satia tad haduh mar shiteng jong u bnai Iaiong mynta u snem. Kumta ha kaba iadei bad katei ka bynta jong ka jingweng noh u Djokovic na katei ka lympung ialehkai, ka khubor ba lah ioh lum ka iathuh ba ha ka jaka jong u un pynmih bujli noh da u Nikoloz Basilashvili. Katba dang ha ka taiew ba lah dep na ka liang jong ki nongpyniaid ka US Tennis Association bad ka US Open ki pynsawa ia ka sur bajam ka jong ki ha kaba iadei bad ka jingai jingkyrshan ia ka jingkyrpad jong u Djokovic uba lah phah ia ka jingthoh sha ki nongpyniai bahalor katei ka ri ba kin shah ia u ba un rung sha ka ri USA.
