Shillong, Lber 07:
Ka Sputnik ka la khur ïa ka jingjop ha ka Super Division Shillong Cricket League 2022-23 hadien ba ka lah pynliem noh ïa ka NFU da 94 run ha ka sngi Ba-ar ha madan Polo.
Ha kane ka jingïakhun, ka Sputnik ka la kam trai shwa ban tied nyngkong hadien ba jop kynting pisa. Haba wan ban tied ka la kamai 202 run bad shah pynkhyllem 7 wiket ha ki 40 over. U Swarajeet Das u la ïoh ban khyrwit ïa ka shiteng spah run da kaba ïoh 58 run na ki 66 bol bad u Tarique Siddique u la ïoh 41 run na ki 51 bol. Katba u Akash Kr Choudhary bad u Netesh Sharma ki la khur mar 2 wiket na ka bynta ka NFU.
Haba wan beh ïa ka thong, ki nongtied ka NFU ki la shah pynkhyllem baroh ki nongtied bad kamai tang 108 run ha ki 29.2 over. U Raj Biswa u la tied 35 run na ki 31 bol bad u Purajit Mandal u la ïoh 21 run na ki 40 bol. Katba u Swarajeet Das u la khur 4 wiket bad 3 wiket da u Aryan Bora. Ïa ka nam Man of the Match la khur da u Swarajeet Das na ka Sputnik.
