Delhi, Lber:
Katkum ka khubor ba la pyllait paidbah da ka synjuk pyniaid jing-ialehkai siat Suloi/Pistol ka ri ka National Rifle Association of India (NRAI) ka iathuh ba naduh kane ka kynti ba mynta, ki nongialehkai ka ri kiba don jingduna ha ka bor iohsngew (Hearing Impairment) kin long kiba bit na ka bynta ba kin shimbynta lang ha ka Selection Trials ha ka kyrdan Minimum Qualification Score (MQS) ryngkatlang bad ki nong-ialehkai ka ri shynrang bad kynthei kiba bit ba biang ha ki dkhot-met ki jong ki.
Katkum ka khubor ba la ioh lum ka iathuh ruh ba ka International Shooting Sport Federation (ISSF) ka lah shah shuh shuh sa arngut ki nong-ialehkai na ka bynta kawei ka rynsan ba kin shimbynta ha ka MQS katba dang iaid shakhmat ka rynsan ne ka Selections Trials na ka bynta ban shah bad ban ailad ia ki nong-ialehkai ba kin lah ha ka ban kynoh sha ka MQS. Shuh shuh ruh ki nongialehkai kiba shimbynta hapoh ka kyrdan MQS ki long ki bym shym la ioh jingbit ne shah pynhap ha kano kano ka kyrdan, khur takma ne ha ka quota.
Kumta ia katei ka jingai jingbit mynta sha kita ki nongialehkai ka ri kiba duna ha ka bor iohsngew ka jong ki lah pynpaw ha ka por ba u nongpyniaid bahakhliehduh ka NRAI u Raninder Singh u dang pynlong ia ka jingialang kaba nyngkongeh ha kaba iadei bad ka jinglong jingman ka met ka phad ki nongialehkai kari naduh ba lah wan lynshop ka jingpang khlam COVID-19 ha ki snem ba lah leit noh.
Kumjuh ruh naba ka ISSF World Cup lah dep ban pynbeit ba kan long ha Bhopal ha ki khyndiat sngi ban wan jong une u bnai ba mynta, ka NRAI ka lah ai jingbit ruh ia ka jingthaw jong kiba bun tylli ki Komiti na ka bynta ban pyniaid beit shakhmat bad pyntyllun ia ki kam ki jam jong ka lympung.
Na ka liang jong ka NRAI ka lah shim ruh ia ka rai ba khatduh ha kaba iadei bad ki tarik na ka bynta ki jing-ialehkai ki ban long ha-iing ha ryngkat bad ka National Championships ka ban sa sdang naduh ka 5 tarik u Naiwieng. Shuh shuh katei ka synjuk pyniaid jingialehkai ka ri ka lah shim ruh ia ka rai ba ka All India G.V. Mavalankar Shooting Championships dei ban pyndep noh ia ka lympung baroh kawei la kumno kumno haduh u bnai Nailar.
Kumta ki kynhun ialehkai na ka bynta ka Asian Cup, ki ban sa shah tyrwa quota hakhmat jong ki na ka bynta ban ioh jaka ha ka Olympic 2024 ha Paris, kin sa shah jied ha shuwa jong u bnai Nohprah mynta u snem.
