New Delhi, Lber:
Na ka liang jong ka synjuk pyniaid jingialehkai hockey ka ri ka HI (Hockey India) ka pynbna khubor ba ka lah pynskhem ia ka kyrteng jong u Craig Fulton kum u nongpyniaid ba thymmai bad ruh u khliehduh jong ka kynhun ialehkai Hockey ki shynrang ka ri.
Ia katei ka khubor la pynbna ha ka jingiaid lynti ka kynhun ha ka jingiakhun jong ka ha-iing ha ka FIH Hockey Pro League ka ban sdang naduh ka10 tarik jong une u bnai. Kumta ruh Craig uba long u nong South Africa bad uba la shakri ia ka kam la jan 25 snem, un sa pyniasohlang ialade mynta bad katei ka kynhun ialehkai ba thymmai ka jong u ha ka por kaba kloi nalor ka jingpyndep ia kiei kiei baroh kiba donkam ban pyndep na ka bynta ban pynskhem ha ka kam.
U long u briew uba lah sei ia u soh uba bang bad ba thiang ha ki por ba lah dep ha ka kam shakri ka jong u. Kumta ruh ka jingkiew jong u sha ka nam ka sdang da ka jingshakri ka jong u ha ka kynhun ialehkai ka Ireland kum u nongpyniaid bahakhliehduh ka kynhun hapdeng jong u snem 2014 haduh 2018 ha ka por ba ka kynhun ka lah shah jied na ka bynta ka Rio Olympic 2016 bad ka long ruh ka sien kaba nyngkong ba ka tei ka kynhun ka lah shah jied sha ka lympung ha ki 100 snem jingiaid lynti jong ka.
Ka kam shakri ka jong u kaba u lah pynthaw khana-pateng ha katei ka kynhun ka long ruh ka kam ba seisoh na ka bynta jong u ban rah ia ka khusnam kum u ‘FIH Coach of the Year’ ha u snem 2015.
Hadien katei ka kam ba mynta, u Craig u lah shakri ruh kum u symbud nongpyniaid (Asst. Coach) bad ka kynhun ialehkai kaba dang iai bat kum ka lahduh Olympic ka Belgium, ha kaba ka kynhun Belgium ka lah rah ia ka takma Ksiar ha ka Tokyo Olympic. U long ruh u shi bynta jong ka kynhun ki nongpyniaid ka Belgium ha ka por ba ka kynhun ka lah rah ia ka thong jingjop ha ka pyrthei ha u snem 2018 ha Bhubaneswar.
Hadien kata u lah shah jied ruh kum u ‘Belgium Coach of the Year 2023’ hadien ba u lah dep ban shakri ia ka kam ha ka klob ialehkai ka Belgium kaba lah rah ia ka thong jingjop ha ka Belgium League. U lah long ruh u shi bynta jong ka kynhun ialehkai ka ri Belgium ban kiew sha ka kyrdan bahakhliehduh ha ka pyrthei ha ka jingialehkai Hockey, da kaba rah ia ka kynhun sha ka kyrdan ba 3 ha ka pyrthei ha une u snem ba mynta na ka kyrdan ba 5 ha u snem 2018.
