Nongstoiñ, Lber 07:
Ka Ri Bhoi United FC ka la jam sha ka final ha ka lympung ïalehkai Invitation Knockout Football Tournament 2022-23 ba la pynlong da ka New Nongstoiñ Sports Social & Cultural Club.
Kane ka jinglah ban pyntikna ka la wan urlong hadien ba ka lah pynliem noh ïa ka Assam Regiment da 3-1 kol ha ka jingïakhun semi final jong ka wat ba ar (2nd leg) kaba la long ha ka sngi Ba-ar ha madan New Nongstoiñ.
Watla ka la mad ïa ka jingshah rem ha ka wat ba nyngkong ha ka Assam Regiment da 2-1 kol, pynban ha kane ka jingïakhun jong ka wat ba ar, ka Ri Bhoi United ka la lah ban ïalehkai naduh kaba sdang da kaba lah ban tam lyngba ka aggregate da 4-3.
Ha kane ka jingïakhun kaba khatduh baroh ar ki kynhun ki la pyrshang ban ïakhun tyngeh naduh kaba sdang. Watla kine ki kynhun ki la ïoh ïa ki kabu kiba biang, hynrei kim shym la lah ban thep kol haduh kaba kut jong ka kylla step.
Hadien shi minit ba la bteng ïa ka jingïakhun jong ka kylla miet ba ka Assam Regiment ka la ïoh ban pynkhih jar nyngkong eh lyngba u H.Noaba. Tang hadien katto katne por ka Ri Bhoi United ka la ïoh ei shi kol na ka daw ka jingbakla thep hi da u rangïalehkai ka Assam Regiment ha ka minit kaba 71.
Ka Ri Bhoi United ka la ïoh thep biang ïa ka kol ba ar lyngba u Aibiang Nongneng ha ka minit kaba 72 bad hashwa ban wai kane ka kynhun ka la pynbud biang ïa ka kol kaba khatduh lyngba u Meban Wahlang ha ka minit kaba 85 na ka bynta ban khur syndon ïa ka jingjop.
U rangïalehkai ka Ri Bhoi United u Batskhem Thangkhiew u la ïoh ban khur ïa ka nam ‘Man of the Match’.
