New Delhi, Lber:
Kawei na ki khlur iakura ba pawkhmat ka ri ka Nikhat Zareen; ka ban sa ialam nakhmat ia ka jingiaid lynti jong ka kynhun iakura ki kynthei ka ri ha ka lympung ialehkai IBA Women’s Boxing World Championship ka ban long ha Delhi, ka la pynpaw ia ka jinglong ba skhem bad ba thikna ha kaba iadei bad ki lad ki lynti kiba la plie ha ka mynta.
Kumta ruh na ka liang jong katei ka nongkhur takma Ksiar na ka Commonwealth Games ka pynpaw ba ka long kaba thikna ba ka jingleit shim bynta ha ka IBA Women’s Boxing World Championship kan long ka lad ka lynti ha kaba kan ialeh ruh na ka bynta ban wanrah ia ka nam bad ka burom sha ka ri baroh kawei sa shisien pat.
Shuh shuh ruh katei ka nongiakura na ka jylla Hyderabad ka long ruh ka nongialehkai kaba lah wan dur bha ha ka kam ialehkai ka jong ka, ha kaba ka la lah ban khur takma Ksiar ha ka World Championship ha Istanbul na ka kyrdan iakura ha ka Flyweight bad kumjuh ruh na ka lympung ialehkai CWG kaba lah long ha u snem ba lah dep ha Birmingham kata na ka kyrdan Light Flyweight, hynrei ka thong kaba hakhmat eh ba ka don mynta ka long bna khur ia ka takma Ksiar na ka lympung ialehkai Olympic ka ban sa long ha u snem ban wan ha Paris.
Ka Nikhat ka lah pynpaw ruh ba lada ka lah shisha ha ka ban khur takma Ksiar na ka lympung ialehkai Olympic, khlem pep ka kwah ban iakynduh markhmat bad u tyngshop ba pawnam ka Bollywood u Salman Khan sa shisien biang pat bad lehkmen lang bad u.
