Lausanne, Lber:
Katkum ka khubor ba la ioh lum ka iathuh ba na ka liang ka synjuk pyniaid jing-ialehkai Athletics ha kylleng ka pyrthei ka WA (World Athletics), sa shisien biang pat ka la kner ia ka jingiarap na ka bynta ban synniang song pisa sha ki nongialehkai ka Ukraine. Kane ka long na ka bynta ki nongialehkai kiba dang iai pynkhreh bha ialade mynta ia ka lympung ialehkai World Athletics Championship (WAC) ka ban sdang naduh 19-27 tarik u Nailar 2023 ha Budapest.
Nalor kata, katei ka synjuk ka pynbna ruh ia ka jingpynthymmai ha kaba iadei bad kata ka jingsynniang pisa sha ki nongialehkai ka ri Ukraine ia kaba la tip kum ka Solidarity Fund, ryngkatlang bad ki katto katne tylli ki sienjam ba ka la pynkhreh shakhmat na ka bynta ka jingkynjoh sha katei ka bynta jong ka jingiaryngkat kyrdan hapdeng ki shynrang bad kynthei kaba long kum shi bynta jong ka #WeGrowAthletics Campaign ka jong ka.
Kumta na ka liang jong ka WA ka la sam ruh palat $220,000 ka song pisa sha palat 100 ngut ki nongialehkai ka ri Ukraine ha u snem 2022. Kumta ki nong-ialehkai kynthei kiba kynthup ia ka nongialehkai Hurdles ka Anna Ryzhykova, kynthup ia ka 70% jong ka jingsyniang pisa jingiarap.
Na ka liang jong kawei na ki nongialehkai Hurdles katei ka ri ka Ryzhykova ka pynpaw ia ka jingkyrmen ka jong ka ha kaba kiwei pat ki mad ia kita ki jingeh bad ki jingsngewsih ba ki iakynduh. Shuh shuh ka lah iai ban ruh ba ki nong-ialehkai jong ka ri baroh kawei ki klet noh ha kaba iadei bad ka kam ialehkai ha ka jingim jong ki, ki jingphohsniew ba ki kwah ban pynurlong bad ki pyrtkhat beit tang kumno ban lait-im ialade bad ban iarap ia kibaq haiing hasem jong ki na ka jingshah hiar thma ha ka ri Russia, bad kata ka Solidarity Fund jong ka World Athletics da shisha ka lah pyllait-im ia ki nongialehkai katei ka ri bad ia ka kam ialehkai ha ka jingim jong ki bad ai ruh ka lad ka lynti na ka bynta ban iakhun na ka bynta ka ri baroh kawei ha ka kam ialehkai ba shimet-shimet ka jong ki.
Napdeng kiwei pat ki sienjam jong katei ka synjuk ha ka jingpynkhreh shakhmat ka jong ka ha kaba iadei bad ka jingwanrah ia ka jingia ryngkat kyrdan hapdeng ki rang bad ki thei ialehkai, ka World Athletics ka la pynkhreh ban don 40% ki kynthei ki ban shimbynta bad la kumno kumno kawei ka riew kynthei ha ka kam vice-president jong ka World Athletics Council mynta u snem.
Namar kata, na ka liang u nongpyniaid bahakhliehduh katei ka synjuk u Sebastian Coe u iathuh ba ka jingiaryngkat kyrdan hapdeng ki shynrang bad kynthei ka long ka bynta kaba donkam bha mynta jong ka jingpynthymmai ia ka rukom treikam ha ka synjuk naduh ba lah pynithuh paidbah ha u snem 2016.
