Mumbai, Lber:
Ha ka jingiaknieh rah ia ka khusnam ‘Best PSU for Promotion of Sports’ ha ka prokram sam khusnam jong ka Sportstar Aces, ka khubor ka iathuh ba ka ONGC ka lah ioh ban rah ia katei ka nam.
Kumta katei ka kompani kaba long ruh ka bynta kam shakri paidbah ka jong ka, ka lah sei nalade ia ka song pisa kaba haduh 8 klur na ka bynta ka mang tyngka ka jong ka ha ka kam ialehkai jong u snem, lem bad ka jingbynrap ruh ia ka T. 45 klur ha kaba iadei bad ka jingsiew tulop bad kumno kumno ruh haduh T. 2.3 klur na ka bynta kiwei pat ki jingai jingmyntoi.
Ha baroh shi lynter jong u snem, ka ONGC ka lah kyrshan ruh ha ka ban kyntiew ia ki 11 tylli ki jait jingialehkai kaba kynthup naduh ka Athletics, Badminton, Billiards & Snooker, Boxing, Carrom, Chess, Hockey, Kabaddi, Lawn tennis, Shooting bad Table Tennis.
Ki nongialehkai kiba lah ioh ia ka jingkyrshan bapura na ka ONGC ki long u Arpinder Singh, M.R Poovamma, Kirpal Singh, Ashwini Ponappa, Sourabh Verma, HS Prannoy, Rituparna Das, B Sai Praneeth, Pankaj Advani, Koneru Humpy, Vidit Gujrathi, Yuki Bhambri, Ankita Raina, G Sathiyan, Harmeet Desai. Kumta ruh ki nongialehkai kiba lah ioh ia ka jingkyrshan na ka, ki ioh ruh ha ka ban khur haduh 56 tylli ki takma; kaba kynthup ia ki 27 tylli ka takma Ksiar, 18 ka Rupa bad 11 ka Rnong ha baroh shi lynter jong ki lympung ialehkai bar-ri ba ki shimbynta da ka jingkyrshan ka jong ka.
Nalor ka jingaikam-aijam ia ki nongialehkai ha kiba bun tylli ki bynta jong ki jait jingialehkai, ka ONGC ka tyrwa ruh ia ka bai-bam ialehkai (Sports Scholarship) kaba haduh T. 15,000 bad T. 30,000 sha ki nongialehkai kiba dei hok ban ioh katkum ka hok ka jong ki.
La jan kumba 800 ngut ki nong-ialehkai kiba lah ioh jingmyntoi na ka kam ai jinghikai bad na ki prokram iasamlem kaba ki don ia kaba lah pynlong ha Ahmedabad (Gujarat), Assam, Dehradun (Uttarakhand), Karaikal (Tamil Nadu), Rajahmundry (Andhra Pradesh) & Hyderabad (Andhra Pradesh) ha ryngkat bad ka jingshah pynbiang ia ki jingdonkam la palat 300 ngut bad ka baibam sha ki khynnah.
