Shillong, Lber 08:
Ka Meghalaya Chess Association ha ryngkat ka Aurobindo Institute of Indian Culture, Shillong ka la rakhe ïa ka sngi kyrpang jong ki kynthei ïa kaba la tip kum ka International Women’s Day ha ka sngi Balang ha kane ka nongbah. Ka phang pdeng mynta u snem jong kane sngi kyrpang ki kynthei ka long halor ka bor kaba kyrpang jong ki kynthei.
Ha kane ka sngi la ïadon lang u General Secretary ka Meghalaya Chess Association u Bah Khrawkupar Pajat, kumjuh u Publicity Secretary u Bah Rijied Katrai, u Th B. Singh, ryngkat ka Principal Mothers School jong ka Sri Aurobindo Institute of Indian Culture ka Farida Khan bad ki ’thei ïalehkai chess.
Ka jingrakhe ïa kane ka sngi kaba kyrpang ka dei namar ba ki kynthei ki long kiba kham kongsan ha baroh ki liang la ka long ha ïing ha sem, ha ka imlang sahlang bad kiwei. Haba phai sha ka jingïalehkai Chess, ka syiem ka long kaba kham kongsan namar khlem ma ka, u syiem um lah ban leh eiei. Kumta la pynïasyrïem ïa ka syiem kum ka kynthei.
Haba ai jingkren ha kane ka sngi, u Bah Khrawkupar u la ong, “Ka jingïalehkai Chess ka don ka jingïadei bad ki kynthei namar ka dei ka syiem kaba kongsan ha kane ka jingïalehkai namar khlem ma ka, u syiem um lah ban leh eiei.”
“Kumta ki kynthei ki long kiba kham kongsan ha ka jingim kaba manla ka sngi la ka long ha ïing ha sem bad kumjuh ha ka imlang sahlang. Ka syiem ka long kum ka kmie, katba ki ‘pawn’ ki long kum ki khun. Kumta ka shong ha ka kmie kumno ba kan ïalam.”
Ha kawei pat ka liang, ka Farida ka la ong ba ïa kane ka sngi kaba kyrpang la rakhe ha kylleng ka pyrthei. Kumta na ka liang ka Mothers School jong ka Sri Aurobindo ha ryngkat ka Meghalaya Chess Association ngi la rakhe ïa kane ka sngi.
Ha kane ka sngi la ïoh ruh ka jingkren na u Secretary barim ka MCA Th. B. Singh bad la pynlong ruh ïa ka jingïalehkai chess hapdeng ki ar ngut ki nongïalehkai chess ka jylla.
