Delhi, Lber:
Kumba saw ngut ki nongialehkai Karate ka ri ki la shah pynngat mynta ha ki kyndon jingpynshitom, hadien ba kitei ki nongialehkai la lap ba ki lah iashoh bad beh shabar ia uwei na ki nongialehkai Karate ha ka kyrdan Junior halor ka jingleh-kmen leh-sngewbha ka jong u ia ka jingrakhe dap sngikha hapoh ka ïing basa jong ka Sports Authority of India (SAI).
Shuh shuh ruh ha kaba iadei bad katei ka bynta, ka khubor ka iathuh ruh ba katei ka jingjia ka la jia naduh ka 4 tarik jong u bnai ba la dep ha kaba uwei na ki nongialehkai ba dang 16 snem u la leh-kmen ia ka jingdap sngikha ka jong u ha ka kamra iing-basa. Hadien kata la wan lap da kitei ki saw ngut ki nongialehkai bad sdang shoh kumjuh ban tied bad bom da ki kynja nar ha ryngkat ka jingkynjat ia u shabar na ka kamra.
Kumta hadien ka jingleit ban ujor da u kpa jong utei u khynnah sha ki nongpyniaid bahalor jong ka SAI, na ka liang jong ka komiti treikam kaba don ia lai ngut ki dkhot ki lah ioh ia ka jingbit na ka SAI na ka bynta ban pynlong ia ka jingtohkit bad bishar bniah bin-pa-bin halor katei ka jingjia.
Hadien ba lah dep ban leh ia katei ka bynta, ka Komiti ka lah ioh ban kem noh ia kitei ki saw ngut bad rai pynrem ia ki halor katei ka jingleh bad kaba lah rai ruh ha ka ban shim ia ki sienjam kiba pyrkhing kum ka jingpynshitom pyrshah ia ki.
Kumjuh ruh ia ka tei ka jingjia lah leit ban ujor ruh sha ka tnad pulit ha ryngkat bad ka mukotduma ia kaba lah pynrung hapoh ka kyndon ain Indian Penal Code (IPC).
