Seoul, Lber:
U Jurgen Klinsmann, uba mynta u lah shah thung kum u nongpyniaid ba thymmai jong ka kynhun kynjatbol ka ri South Korea, u la pynlut khyndiat ka por ha ka ban pynbit pynbiang ialade ha kaba iadei bad ka thong ba nyngkong ba u don na ka bynta ka kynhun hadien ba u la poi iuh-kjat ha kad-liengsuin ha Incheon. Nangta u la pynpaw ba u kwah ban pynkut noh ia kata ka jingiai ngam ka kynhun ha ka jyrsieh ha ka jingiaid lynti ha ka Asian Cup kaba la nang iai jlan lah palat 60 snem mynta.
Shuh shuh ka khubor ka iathuh ba utei u nongpyniaid barim jong ka Germany u lah dep ruh ha ka ban iasoi ia ka jingiateh kontrak bad katei ka kynhun ha kaba un iai pyntyllun ia ki kam ki jam kum u nongpyniaid bahakhliehduh jong ka haduh u snem 2026 jong ka lympung ialehkai World Cup bad uba lah shimti mynta ia ka jaka jong u Paulo Bento; uba lah mih noh na ka kynhun ha u bnai Nohprah hadien ba ka South Korea ka lah mad ia ka jingshah rem noh ha ka rynsan iakhun pre-quarterfinal jong ka World Cup 2022 da ka jingshah pynliem noh ha ka Brazil.
Kumjuh ruh ka khubor ka iathuh ruh ba ka South Korea ka long kata ka kynhun ialehkai kaba lah plie ia ka lynti iaid jong ka ha ka Asian Cup da kaba rah ia ka nam kum ka lahduh ha u snem 1956 bad ka jingjop ba khatduh eh ba ka lah ioh ban khur na ka lympung ka long ha ka por ba ka dang iai bat halade ia ka trophy kum ka nongpyniaid jog ka lympung ha u snem 1960.
Kumjuh ruh u nongpyniaid barim ka kynhun u Hiddink u la lah ha ka ban btin lynti ia ka kynhun shaduh ka jingiakhun semifinal ha ka World Cup 2002.
Hynrei hapoh ka jingpyniaid jong u Bento, katei ka kynhun ka la lah ban pynliem noh ia ka Portugal bad sar ka jingiaid lynti jingjop ka jong ka na ka bynta ban rung shaduh ka jingiakhun pre-quarterfinal.
Katei ka kynhun ka la lah ruh ha ka ban pynliem noh ia ka lahduh barim ka lympug ka Germany Shabar na ka rynsan iakhun Group ha ka World Cup 2018.
Dei ha u bnai ba lah dep ba u Klinsmann uba lah pynbna ia ka jingshimti jong u ia katei ka kam kum u nongmih bujli jong u Bento, bad kum u rangialehkai bad kum u nongpyniaid, u Jurgen u lah rah ia ka jingjop ha ka World Cup 1990 kum u rang-ialehkai ka Germany bad kum u nongpyniaid jong ka kynhun ialehkai barim ka jong u, u la lah ban rah ia ka kynhun shaduh ka jingiakhun semifinal ha ka lympung ialehkai World Cup ha u snem 2006.
U long ruh u nongpyniaid uba la lah ban pyniaid ia ka klob ialehkai barim ka jong u ka Bayern Munich; ha shuwa ba un shimti kum u nongpyniaid bahakhliehduh jong ka kynhun ialehkai ka USA na ka bynta ka aiom ialehkai ba 2011-16.
Ka sien kaba khatduh ha kam shakri kum u nongpyniaid ka long ka jingioh ban pyntyllun ia ka kam tang ha ki 10 taiew ha ka klob Hertha Berlin jong ka lympung Bundesliga ha u snem 2020.
