Shillong, Lber 09:
Ka jingdon jong ki ’riew ieit phutbol ka la long shisha ka jingkyrkhu na ka bynta ki nongïalehkai bad ka shnong ka thaw ba kin nang lah ban pynjanai ha ka kam ïalehkai. Kane ka la wan urlong hadien ba ki la lah ban plie ïa ka madan Futsal ha ka sngi Balang ha Diengïong kaba ha Mawdiangdiang.
Ïa kane ka madan ïalehkai kaba la siang da u phlang plastik (40 m x 22 m) bad ba la pynïeng ruh da ki thaba jingshai ne floodlight ha baroh sawdong ka madan da ka jingbei tyngka jong saw ngut ki rangbah ïa kaba la tip kum ka ‘4 For All’. Kine saw ngut ki rangbah ki long u Bah Dawanshan Kharbudon, Bah Mebanshan Kharbudon, Bah Nathaniel Kharbudon bad Bah Ardentson Syngkon.
Ïa kane ka madan ïalehkai (FIFA Certified Futsal Turf) la plie da u Pastor ba rangbah jong ka Balang Presbyterian Rev. R.R Cunville kum u kongsan ha ryngkat ka jingïadon lang ruh u MDC ka Sohryngkham Constituency u Bah Pynïaidsing Syiem kum u symbud kongsan, u Tymmen Basan. T. Mark, Kong Agnes Kharshïing, Bah Francis Kharshïing bad kiwei.
Haba ïaken bad u nongthoh khubor, u Bah Dawanshan Kharbudon u la ïathuh ba ka jingthmu jong ka jingsiang ïa kane ka madan ka long ban plie lad ïa ki khynnah, ki samla bad ki rangbah ba kin pyni ïa la ki sap ïalehkai phutbol. “Kane ka madan ka long na ka bynta ban aiwai ïa kino kino kiba kwah ban kilanmet ne ban pynlong ïa kino kino ki lympung ïalehkai.”
“Kum ki rangïalehkai ha ki por kiba mynshwa, ngi la ju ïohi ïa ka jingjynjar ban ïoh madan ban ïalehkai bad dei na kane ka daw ba ngi la ïasynñiang baroh saw ngut ban pynurlong ïa kane ka jingthmu ka jong ngi.”
