Christchurch, Lber:
Na ka jingialehkai Test Kriket kaba nyngkong hapdeng ka Sri Lanka bad ka New Zealand, ka khubor ba la ioh lum ka iathuh ba u nongtied ba pawnam bad ba la rim tam jong ka kynhun ialehkai ka Sri Lanka u Angelo Mathews, mynta ka kynti u la lah ban tam noh shakhmat ia u kapten barim jong katei kynhun ialehkai u Sanath Jayasuriya bad kylla long ruh uba lai napdeng ki rangialehkai Kriket katei ka ri ban kynjoh mynta sha ka 7000 ron ha katei ka kam ialehkai.
Ka long ruh ka jingjop kaba khraw na ka bynta katei ka ri kaba don marjan bad ka India, naba katei ka kynhun ka la lah ban ialehkai bha naduh kaba sdang. Kumta ruh ha katei ka jingiakhun, u Mathews u la lah ban kamai ron bha kata da 47 ha kaba sdang jong ka jing-ialehkai ha Basin Reserve bad ha kaba ka kynhun jong u ka lah kynjoh sha ka 305/6 na ka bynta ban iai pynsah ia ki jingkyrmen ki jong ka ban ioh rung sha ka lympung ICC World Test Championship Final pyrshah ia ka Australia ha u bnai Jylliew mynta u snem.
Shuh shuh ruh ka khubor ka iathuh ba ka Sri Lanka ka donkam ban rah ia ka jingjop da 2-0 pyrshah ia katei ka kynhun iakhun pyrshah ha New Zealand bad kaba shaniah tylli ha ka India ka bym shym la pynliem ia ka Australia ha ka lympung iakhun Test ka jong ka ha Ahmedabad na ka bynta ban jam sha ka jingshim rai ha kaba iadei bad ka World Test Championship. Kumta da ka jingiatreilang jong u Mathews & Dinesh Chandimal (39) ha kaba ka jingkhein kyllum ia ka ron ba ki lah kamai ka long da 82 bad kaba lah pynlong ruh ia u tei u nongtied ka kynhun ban lah tam noh shakhmat ia ka 6973 ron jong u Jayasuriya ha ka jingialehkai Test; kata ha shuwa ba u Mathew un shah pynliem noh ha u nongkawang bol ka NZ u Matt Henry tang hadien ba u la lah ban pynurlong halade bad ia ka kynhun ban kynjoh sha kitei ki 7 hajar ron ha ka Test.
