London, Lber:
Kawei na ki kynhun ialehkai phutbol kaba heh tam ha satlak ka pyrthei ka “FIFPRO”, ka pynpaw mynta ba ka lympung ialehkai World Cup hi kam dei satia ban long sa shisien biang ha ki bnai tlang kata naduh u bnai Naiwieng haduh u Nohprah; naba bun na ki nongialehkai jong ki kynhun ialehkai ki ri bapher bapher ki pynpaw ia ka jingbym sngewtynnad ban shimbynta ha ki jingialehkai ka lympung.
Shuh shuh ruh ka FIFPRO ka lah pyllait ruh ia ka World Cup 2022 Post-Tournament Review bad Player Survey ka jong ka bad kaba lah ong ruh ba u soh uba lah mih na katei ka jingleh jong ka ki long tang da ki jingbymsuk bad jingtieng da ki nongialehkai na ki ri bapher bapher ha kaba iadei bad ka bor pyrkhat bad ruh ka met ka phad ka jong ki bad kiwei pat ki jingmynsaw ba ki mad ha ki jingialehkai.
Kumjuh ruh 64 ngut ki rangiakehkai World Cup lah dep ban wad bniah ha ki ha kaba iadei bad katei ka bynta bad ruh ka jingduna ka por ha kaba iadei bad ka jingpynkhreh bad ban khyllie ruh ia ka por ba ki lah duh bad kata baroh ka kyntiew shuh shuh ia ka jingma ha ka koit ka khiah kaba long ka mat kaba kongsan tam eh na ka bynta ki nongialehkai. Kumta tang 11% na ki nongialehkai kiba lah pynpaw ia ka jingsngewtynnad ka jong ki ban pynlong ia ka lympung ialehkai World Cup ha ki bnai tlang; kata naduh u Naiwieng ne Nohprah.
Hynrei na ka liang jong u Baer-Hoffman u pynpaw ba ka jingiai ban biang da ki nongpyniaid bahalor ka lympung ialehkai ban pynlong biang sa shisien ha ki bnai tlang ka long ka bym lah ban pdiang satia.
Haduh kumba 86% na ki nongialehkai ki pynpaw ia ka jingkwah jong ki ba la kumno kumno kin ioh por haduh ar taiew (14 sngi) na ka bynta ka jingpynkhreh jong ki shuwa ka por, katba 61% ki pynpaw ia ka jingkwah jong ki da 14 haduh 28 sngi ka por na ka bynta ka post-World Cup.
Kata ka mut ka jingpynduna ia ka prokram ialehkai ka mut ruh ba ka Pre-World Cup ka paw na ka bynta kiba bun ki nongialehkai kiba na ka thain Europe kaba long tang hynriew ne hynniew sngi.
