Lausanne, Lber:
Na ka liang jong ka shnat treikam kaba pyniaid ia ki kam ki jam jong ka World Athletics ha kaba iadei bad ka jingteh lakam ia ka kam dih drok ki nongialehkai ha kylleng ka pyrthei, ka lah thoh sha ka Athletics New Zealand (ANZ) ba kan ai ka jingpynshai halor ka jingbym shym la lah ban pynbiang ne ka jingbym-bit-bym-biang satia ha ka jingleh jong ka ia ka jingpeitbniah sha baroh ki nong-ialehkai jong ka ha u snem ba lah dep.
Kumta ruh na ka liang jong ka Athletics New Zealand ka iathuh ba ka lah ioh ia ka shithi na ka Athletics Integrity Unit (AIU) ha ki bnai ba shadien jong u snem ba lah dep ha kaba iadei bad ka jingleh ia ki jingpeitbniah ha ki nongialehkai kiba ia aireng ha u snem ba lah dep ha ka World Championships ha Eugene, Oregon.
Kumta na ka liang jong ka Athletics NZ ka iathuh ruh ba ka Drug Free Sport New Zealand (DFSNZ), kaba long ka shnat treikam ka ri ha kaba iadei bad ka Anti-Doping, ka lah dep ban pynlong ruh ia mar shiteng ha kiba bun tylli ki jingpeitbniah ba ka lah leh sha ki nongiaklehkai kumba ka ju iai pyntyllun ia ka kam ha baroh ki bynta jong ki jingialehkai ha shuwa ka World Championships na ka daw jong ki kyndon pyrkhing ba lah buh da ka sorkar katei ka ri ha kaba iadei bad ka khlam COVID-19.
Ka DFSNZ ka iathuh ruh ba ka jngwan ban lynshop kynsan da ka khlam COVID-19 ha kylleng ka pyrthei ka lah pynlong ia ka shnat treikam ha ka ban sangeh noh shuwa ban pynlong ia ka jingpeitbniah bad hap ban pynsahteng ia ka kam na kaba ka dei ban pyndep; naba kam shym la ioh ia ka bynta ha kaba iadei bad ka jingai jingiada bad ka jingshngain ban pyntreikam pura sha ki nongialehkai.
Kumta baroh-lin ka jingbun ba ka DFSNZ ka lah dep ban leh ia ka jingpeitbniah ka jong ka sha ki nongialehkai na ka bynta shi snem haduh ka 30 tarik u Jylliew 2022 ka long kumba 50%. Kumjuh ruh naduh ka 1 tarik u Naitung 2022 ka jingbun jong ka jingpeitbniah ka lah khlain shisien biang bad ha ka jingshisha na ka bynta ka shi snem haduh ka 30 tarik u Jylliew 2023, ia kaba lah khmih lynti ban ioh lum bun tylli shuh shuh ki nongmuna ha ka shi snem.
Ka Athletics NZ ka iathuh ruh ba ka lah wanrah ruh ia ka jingthmu lem bad ka DFSNZ na ka bynta ban leh ia ka jingpeitbniah ia ka kynhun ialehkai jong ki nongialehkai kiba lah ban shah jied na ka bynta ka lympung ialehkai mynta u snem ka Athletics World Championships ha Budapest.
