Shillong, Lber 10:
U Myntri ba dei khmih ïa ka tnat ïalehkai jong ka Sorkar Jylla u Bah Shakliar Warjri u la pynpaw ba ka kam ka jong u ka long ban ïaleh katba lah ha ka ban kyntiew ïa ki kam ïalehkai bapher bapher.
“Nangne shakhmat ngin sdang ban ai ki lad jingïarap la ka long ha ka baibam (scholarship) sha baroh ki khun samla kiba don ïa ki sap ïalehkai bapher bapher khnang ba ki lah ban nangkiew shaphrang ha ka kam ïalehkai,” la bynrap une u Myntri ba dang 26 snem ka rta na ka Mawthadraishan Constituency ha ka jingïalang pynkup burom ïa ka kynhun ïalehkai ka Jylla kaba la wan ha ka kyrdan ba-ar ha ka Santosh Trophy kaba long ha ka Sngi Thohdieng ha madan Ïewrynghep kaba ha Laitumkhrah.
“Kat kum ka jingïoh lum jingtip ka jong nga na ki bor ba dei khmih kane ka tnat ka long ba kiba bun ki jaka ïalehkai ki dang don hapdeng ka jingtei. Kumta nga la khmih lynti ba ïa kine baroh dei ban pyndep noh hashwa jong u Nohprah mynta u snem,” u la bynrap.
“Kumba ka Sorkar MDA-II hapoh ka jingïalam u Conrad Sangma kum u Myntri Rangbah, ka la bynshet ha nga kum u Myntri ban khmih ïa ka tnat ïalehkai, nga don ka jingkitkhlieh ban kyntiew ïa ki kam ïalehkai la ka long ha ka phutbol, kriket, karate, athletics bad kiwei ki jingïalehkai.”
“Hashwa ba kane ka kynhun ïalehkai phutbol kan poi ha kane ka burom, nga tip ba phi la don ha ka jingïaid lynti jngai ban kynjoh sha ka thong. Hynrei dei lyngba ka jingtrei shitom ka jong phi ki rangïalehkai bad kumjuh ka jingkhlaiñ ha ka jingmut jingpyrkhat jong u coach ba phi sa lah ban kynjoh sha kane ka thong ha ka sien kaba nyngkong eh,” u la bynrap.
“Mynta u snem phi la poi shaduh ka final, hynrei nga khmih lynti ba lyngba ka jingtrei shitom phin sa lah ban rah syndon ïa ka nam lahduh. Kum u Myntri nga pynshlur ïa phi ba phin dang ïai trei shitom ha ka kam ïalehkai khlem da kynran dien noh wat hapdeng ki jingeh kiba bun ha ka jingïaid lynti.”
Namarkata, une u MLA ka Mawthadraishan konstitwensi u la kyntu ïa ki khun samla ba kin shim khia ha ki kam ïalehkai bapher bapher namar kam dei shuh tang ka jingpynmyllen, hynrei ka la long ka lad aikam aijam ïa ki ha ka lawei ka ban wan.
