Shillong, Lber 10:
Ka tnat ïalehkai jong ka Sorkar Jylla ka la pynkup burom ïa ka kynhun ïalehkai ka Jylla kaba la wan ha ka kyrdan ba-ar ha ka 76th National Football Championship na ka bynta ka Santosh Trophy 2022-23, kaba la kut dangshen ha Riyadh kaba ha Saudi Arabia.
Ïa kane ka jingpynkup burom la pynlong ha ka Sngi Thohdieng ha Madan Ïewrynghep kaba ha Laitumkhrah ha ryngkat ka jingïadon lang u Myntri ba dei khmih ïa ka tnat ïalehkai u Bah Shakliar Warjri kum u kongsan, u Director ka tnat ïalehkai u Vibhor Aggarwal (IAS), u Director ka tnat I&PR u Malthus S. Sangma (MCS), ki nongïalam ka Meghalaya State Olympic Association (MSOA), Meghalaya Football Association (MFA) bad ki kmie ki kpa jong ki rangïalehkai bad ki paidbah.
Kane ka tnat ka la pynkup burom da ka song pisa kaba T. 4. 5 lak sha kane ka kynhun da kaba pynïasam mar T. 20 hajar tyngka sha baroh 22 ngut ki rangïalehkai bad mar T.5000 sha ar ngut ki coach.
Kane ka tnat ka la aiti ruh ïa ka cheque kaba T. 28,91,216 tyngka sha ka synjuk ïalehkai jong ka Meghalaya Football Association (MFA) halor ka jinglah katei ka kynhun ban jam shaduh ka final ha ka sien kaba nyngkong eh ha ka lympung Santosh Trophy mynta u snem.
Kham hashwa kane ka tnat ka la pynlong ruh ïa ka ‘Open Truck Road Show’ kaba la sdang na Madan Heh kaba ha Mawlai Phudmuri – Jaïaw Jingthangbriew – Jaïaw St. Joseph – Jaïaw Langsning – Jaïaw Pdeng – Mawkhar Main Road – Motphran – Police Bazar – AG Office – Additional Secretariat – Barik – Malki Point – Dhankheti – Don Bosco Square – Laitumkhrah Beat House bad ban pynkut ha Madan Ïewrynghep. Ha kane ka prokram la synran lang da ka kynhun ki nongñiah thuk-thuk bad ki dkhot ka MFA da kaba ïaid ter-ter ki surok jong ka nongbah bad ka kynhun jong ka Flash Mob.
Kum ban shu pynkynmaw ba ha kane ka kynti kaba mynta, ka Meghalaya kaba la rung shaduh ka final jong katei ka lympung kaba la long ha Riyadh, ka la shah rem noh ha ka Karnataka da 3-2 kol.
