Wales, Lber:
Ka Kaylee McKeown (Australia) kaba long ka nongialehkai jngi-um ba pawnam bha ha ka pyrthei kaba la lah ruh ban khur ia ka nam kum ka lahduh ha ka lympung ialehkai Olympic haduh lai sien kynthih, ka la lah mynta ka sien ban pynpra ruh ia ka rekod ha ka pyrthei na ka jingiakob jngi ha ka 200m Backstroke ha ka lympung ialehkai kaba long mynta ka New South Wales State Open Swim Championships.
Kumta ha katei ka jingiakhun, ka McKeown ka la lah ban pyndep ha ka 2 min 03.14 sekhon da kaba khur noh ia ka rekod kaba 0.21 sekhon jong ka nongialehkai na USA ka Regan Smith kaba la lah ban thaw na katei ka lympung ialehkai ha u snem 2019. Shuh shuh ruh ka McKeown ka la khur ruh ia ka takma ksiar ha ka 100 & 200 Backstroke ha ka Olympic ha Tokyo. Nangta ka dei ruh ka dkhot jong ka kynhun ialehkai ka ri Australia kaba lah rah ia ka thong jingjop ha katei ka lympung ialehkai na ka jingialehkai 400m Medley Relay.
Haba phai sha ka jinglah jong ka ban thaw ia ka rekod ba thymma ha katei ka lympung ialehkai ba mynta, ka khubor ka iathuh ba katei ka nongialehkai ka la lah ban pynurlong halade ia katei ka bynta ha ka sngi sdang jong ka jingialehkai jong ka New South Wales Meet ha Sydney Olympic Park Aquatic Centre kaba long ruh ka jaka ialehkai kaba ju iai pynlong ia ki 2000 tylli ki rynsan ialehkai jong ka Olympic ha ka jingiakob jngi-um.
