Buenos Aires, Lber:
Katkum ka khubor ba la ioh lum ka iathuh ba ia ki jymphong-kti-ialehkai phutbol (Gloves) ba ju iai phong da u nongapkol ba tbit jong ka kynhun ialehkai bol ka Argentina u Emiliano Martinez khamtam eh kaba u lah phong ha ka jingiakhun phainal pyrshah ia ka France ha ka lympung World Cup 2022 ha Qatar, la die lilam noh ia ki ha ka dor $45,000 kum shibynta ban noh synniang pisa jingiarap sha ka jaka sumar bampong ki khynnah (Children’s Cancer Hospital) jong ka Garrahan.
Shuh shuh ruh ka khubor ka iathuh ba katei ka jaka ai jingsumar ka long kawei na ki jaka ai jingsumar kaba hakhmat eh na ka bynta ki khynnah kiba ioh ia katei ka jait jingpang ha ka ri baroh kawei. Kumta ruh lah pynlong ia ka iew die lilam ia kitei ki tiar ialehkai jong u Martinez ha ryngkat ka jingiadonlang ka jong u lyngba ka kor video kaba u lah shimbynta na ka iingsah ka jong u ha England; kaba u mih ialehkai mynta na ka klob Aston Villa.
Katkum ka khubor ba la ioh lum ka iathuh ruh ba ia kitei ki jymphong-kti lah deng bad pyndonkam ia ki da utei u rangapkol ha ka por ba u mad ia ka kylla jong ka jingiashut tie-breaker ha katei ka jingiakhun phainal ha ka lympung pyrshah ia ka France bad ha kaba ka kynhun jong u ka lah rah ia ka trophy jingjop na ka lympung hadien jong ki 4-2 kol ba ka la lah ban kamai, hadien jong ka 90 min bad ha ki por ba ialehkai ba shakhmat ha kaba ki kynhun ki lah poi sha ka jingiakhaid kol da 3-3.
Namarkata, na ka liang utei u rangialehkai u la pynpaw ruh ba haba ka lad ka wan ha u kum kawei na ki bynta ban noh synniang ia katei ka jymphong kaba u la dep ban pyndonkam ha katei ka lympung, um shym la kyrngah ne artatien satia naba u tip ba ka long ka kam kaba bha tam ba un leh na ka bynta ki khynnah. Kumjuh ruh u Martinez u lah dep ruh ban soi ia ka jingsoi kyrteng jong u hapoh jong katei ka jymphong ha ka por ba pynbna ia ka jingnoh synniang ka jong u ha u bnai Rymphang.
