Lausanne, Lber:
U Executive barim jong ka 21st Century Fox bad uba dei ruh u nong-iasambynta jong ka kam ialehkai Sports ha ri Argentina la lap ba u lah leh ia ka kam ba bakla ha New York; kata halor ka jingdonkti ban pynbam pisa ha ka jingialeh ban iai pynneh pynsah ia ka Television Rights sha ki nongpyniaid bahalor jong ka jingialehkai phutbol bar-ri.
Kumta na ka liang jong ka US Justice Department ka pynpaw ba uta u briew ia kaba lah tip kum u Hernan Lopez la lap ba u la leh ia katei ka kam ba long be-ain ha baroh ki kyndon halor ka jingdonbyntalang ka jong u ha ki skhim bapher bapher na ka bynta ban pynbam pisa ia ki nongpyn-iaid ba halor kynthup ha ka FIFA, CONMEBOL bad CONCACAF. Ha kaba iadei bad katei ka bynta, u Lopez u shah pynngat mynta ha ka jingshah pynshitom da ka jingshah set patok haduh 40 snem ha ryngkat bad ka kuna kaba lah kot shaduh ki millions dollars. Shuh shuh ruh ka khubor ka iathuh ba kawei ka kompani kaba na nongbah Buenos Aires jong ka ri Argentina ka Full Play; kaba lah long trai da u Hugo bad Mariano Jinkis ka iaisha mynta ha ka jingshah peitkhmat bad ha kaba lah khmih lynti ba kan ngat ha ka jingshah dain kuna kaba da ki millions dollar. Ha ka por jong ka Trial, na ka liang jong ka iingbishar ka lah pynsngew ba kumno ki nongpyniaid bahalor jong ka synjuk pyniaid jingialehkai phutbol ka thain Shathie jong ka ri America ka CONMEBOL ka lah shah siew haduh palat $32 million ha ka jingshah pynbam pisa ka jong ka kum shi bynta jong ka jingbamsap kaba lah pynngat ia ka FIFA ha ka jingiakynduh mawsiang bad ha ki kynrum-kynram kiba bun eh ha u snem 2015.
Kumta katei ka jingbamsap ia kaba lah lap da ki bor pyniaid bahalor ka ri US kha-ma-kha ka lah wanrah ruh sha ka jingshah pynhiar shuki noh u nongpyniaid barim jong ka FIFA u Sepp Blatter. Kumta ka iingbishar ka pynsngew ruh ba kiba hakhmat eh ha ka jingpyntreikam ka jong ki halor ka tei ka bynta katkum ki skhim bapher bapher ki long ki hynriew ngut ki briew ba khlainbor bad ba pawnam bha ha ka kam ialehkai phutbol jong ka thain Shathie ka ri America bad kita ki kynthup ia u khliehduh barim ka CONMEBOL u Nicolas Leoz, u Executive barim ka synjuk pyniaid jingialehkai phutbol ka ri Argentina u Julio Grondona, bad u nongpyniaid barim jong ka synjuk pyniaid jingialehkai phutbol ka ri Brazil u Ricardo Teixeira.
Ka khubor ka iathuh ruh ba u Leoz, Grondona bad Teixeira ki long ruh ki dkhot ba pawkhmat jong ka Executive Committee ka FIFA ha u snem 2010 kiba lah ialeh kat ka buit ka bor jong ki na ka bynta ban ai ia ka hok sha ka ri Russia ha ka ban pynlong ia ka lympung ialehkai World Cup ha u snem 2018 bad ruh ka lympung iakhun ha u snem 2022 ha Qatar lyngba ka jingiathep vote kaba lah satah da ka jingiabamsap. Kiwei pat ki nongpyniaid bahakhlieh jong ka kam ialehkai phutbol ka thain Shathie ka ri America kiba lah ioh ia ka jingshah pynbam pisa ki long u Vice president ka CONMEBOL u Eugenio Figueredo, u Secy General ka synjuk u Eduardo Deluca bad uba bat ia ka pla tyngka u Romer Osuna.
