London, Lber:
Kawei na ki karkhana shna kali ba pawnam bha jong ka ri USA ka ‘Ford’ ka pynbna paidbah mynta ia ka jingpynkhreh iatehlok ha kaba iadei bad ka Engine jong katei ka karkhana bad kawei na ki kynhun ialehkai F1 kaba bat ia ka nam lahduh ha ka pyrthei ka Red Bull ka ban long naduh u 2026.
Shuh shuh ruh katkum ka khubor ba la pathai da kawei na ki Channel ba pawnam ka ri Bilat ka BBC, ka long ba ka ‘Ford’ kan long ka shi bynta jong ka jingnoh synniang jong ka ia ka Engine ia kaba lah shna pynwandur bad thaw da ka Red Bull Powertrains ha ka shlem treikam ba ha khliehduh jong ka ha England ka Milton Keynes.
Kumjuh ruh na ka liang jong ka para ka kynhun Red Bull ka AlphaTauri ka don ruh ia ka jingkyrmen ba kan ioh ban pyndonkam ia ka Engine kaba don ia ka shap jong ka Ford. Kumta ka F1 kan don ia ka Power Unit ba thymmai naduh utei u snem da kaba pyndonkam 100% ka jingpynneh ia ka umphniang bad kiwei pat ki jingmyntoi ha ki kali. Kumba ka long mynta, ka Red Bull haduh mynta ka dang pyndonkam da ka V6 Turbo Hybrid Engines ia kaba lah shna da ka paralok barim jong ka; ka Honda na Japan.
Katei ka kynhun ialehkai kaba don ia ki tiar ki tar ha ka na katei ka karkhana ba pawnam ka ri U.S.A kum kata ka karkhana ka ban kyrshan ia ka tei ka kynhun, kan sa pyni ruh ia katei ka Engine ba thymmai ka jong ka ha Manhattan.
Shuh shuh ka khubor ka iathuh ruh ba ka Ford ka lah die noh ia ka shab ka kynhun Jaguar ka jong ka sha ka Red Bull ha u 2004 bad katei ka kynhun kaba dang iai bat kum ka lahduh ka dang iaisah ha kajuh ka karkhana kaba don ha ka pdengduh jong ka ri Bilat.
