Nongstoiñ, Lber 12:
Ka kynhun ïalehkai jong ka Lamare Sports Club na nongbah Shillong ka la ïoh rung sha ka final jong ka lympung ïalehkai Invitation Knockout Football Tournament 2022-23 ba la pynlong da ka New Nongstoiñ Sports Social & Cultural Club.
Ka jingïoh rung jong ka Lamare SC sha ka final jong katei ka lympung ka dei hadien ba ka lah ban pynliem noh da 2-1 kol ïa ka United Sports Club kaba na Kolkata ha ka jingïalehkai semi-final wat ba-ar (2nd leg) jong katei ka lympung kaba la long ha ka sngi Saitjaiñ jong ka taiew ha madan New Nongstoiñ bad haba kheiñ lang ïa ki kol ha ka semi-final wat nyngkong bad ba-ar (1st leg bad 2nd leg) ka Lamare SC ka la jop da 3-1 kol ïa ka United SC Kolkata.
Haba phai sha ka jingïalehkai semi-final wat ba-ar (2nd leg) hapdeng ka Lamare bad ka United SC Kolkata, ka la long shisha ka jingïalehkai kaba itynnad bha namar baroh arliang ki la lah ban ïalehkai bha, hynrei hapdeng ka jingïakhun ka Lamare SC ha ka minit kaba 27 lyngba u Donbor Nongkynrih ka la ïoh thep ïa ka shikol bad watla na ka liang ka United SC Kolkata ka la ïakhun tyngeh da ka jingthmu ban ïoh ban pynphai ïa ka shi kol hynrei kam shym la lah ban pynphai satia haduh ba kut ka kylla step.
Haba bteng ïa ka kylla miet, mar ïasdang u Sahil Harijan na ka United SC Kolkata u la ïoh ban pynphai noh ïa katei ka shi kol bad hadien kane, la ïoh ban sakhi ba ka jingïalehkai ka la long kaba itynnad bha, ha kaba baroh ar liang ki la ïakhun tyngeh khamtam lei na ka liang ka United SC kaba la donkam ban ïoh sa shi kol hynrei ha ka minit kaba 77 ka Lamare SC lyngba u Everbright Mylliemngap ka la ïoh ban pynkhih biang sa shi kol bad ban pynthikna ba ka Lamare kan ïoh ban khur ïa ka jingjop bad rung syndon sha ka final jong katei ka lympung.
Ha katei ka sngi, u Brolington Warlarpih na ka Lamare SC u la ïoh ban khur ïa ka nam ‘Man of the Match’.
Na ka liang ka tournament committee ka NNSSCC ka la pyntip ba ka jingïalehkai final jong katei ka lympung kan long ha ka 15 tarik mynta u bnai hapdeng ka Ri Bhoi United pyrshah ïa ka Lamare SC ha ka por 2 baje janmiet.
