Atlanta, Jymmang:
Uwei u runar u la synreit kuli naphang hapoh ka nongbah Atlanta jong ka United States ha kaba 4 ngut ki briew ki la mynsaw na katei ka jingjia. Ka tnat Atlanta Police Department ka la iathuh ba ia utei u samla 24 snem ba la ithuh kyrteng u Deion Patterson la ioh kem noh hi tang hadien ki khyndiat kynta jong katei ka jingjia.
Katkum ka video ba la iohi bad ioh ring lyngba jong ki Camera CCTV ha katei ka jaka, la iohi ia utei u briew ba u bat ia ka suloi ha ka kti jong u bad hadien ba u la dep siat u la mareh wut wut sha ka kali kaba don ha bar bad u la phet noh bak na katei ka jaka.
U Patterson, u long u nongap pahara barim jong ka US Coast bad u la shah rah noh naka bynta ki jingtohkit bniah ha Cobb County.
U heh pulit Darin Schierbaum haba iakren bad ki lad pathai khubor, u la iathuh ba kitei kiba mynsaw baroh ki dei ki kynthei bad katei ka jingsiat ka la jia hapoh ka kamra ‘Wating Room’ jong katei ka hospital. La iathuh ba ka kmie jong utei uba siat ruh ka iadon lang ha katei hi kajuh ka kamra hynrei kam shym la shah siat ne ngat ha katei ka jingsynreit kuli jong u khun jong ka.
