Agartala, Jylliew:
U Myntri Khynnah jong ka Sorkar Pdeng ba dei khmih ïa ka Tnat Skill Development & Entrepreneurship and Electronics & IT, u Rajeev Chandrasekhar ha kane ka taiew ba mynta u la ong ba “ka jingpynïaid ba thymmai lyngba ka Seva, Sushasan bad Garib Kalyan” (Ka jingshakri ïa ki briew, ka rukom pynïaid kaba bha bad ka bha ka miat jong kiba duk ba suk) jong u Myntri Rangbahduh ka ri, u Narendra Modi ka la ïarap shibun ban wanrah ïa ka roi ka par ha ka thaiñ shatei lam mihngi, da kaba pynlong ïa ka kum ka jaka kaba khring bha ïa ki nongbei tyngka.
“Hashuwa u 2014, ym shym la don kino kino ki kam pynroi ha ka thaiñ shatei lam mihngi bad ki nongbei tyngka ki ju kiar ban wan sha kane ka thaiñ namar ka jingbymdon ki surok ba biang, ki lynti rel lane ki kad liengsuiñ. Mynta la pynïasoh ïa kane ka thaiñ kumba long kiwei kiwei ki jylla ha ka ri. Ka thaiñ ka la kiew shaphrang ha kine ki khyndai snem jong ka jingïalam u Myntri Rangbahduh, u Narendra Modi bad ki ri kylleng ka pyrthei ki kwah ban ïatreilang bad ngi,” la ong u Rajeev Chandrasekhar, haba ai jingkren ha ka jingïalang ba la pynlong da ka Janjati Morcha ha Chakma Ghat Community Hall jong ka Khowai district ha Tripura.
Haba ai jingkren shaphang kumno ka jingïalam jong u Myntri Rangbahduh, u Narendra Modi ka la pynkylla ïa ka jinglong jong ka India na ka synshar paidbah kaba don ki jingduna sha kata kaba khlaiñ bha ha ki khyndai snem ba la leit, u Rajeev Chandrasekhar u la ong ba u Myntri Rangbahduh u la trei borbah haduh “24 kynta shi sngi, hynñiew sngi ha ka shi taiew bad 365 sngi ha ka shi snem” tang na ka bynta kawei ka thong – ka roi ka par bad ka jingkiew shaphrang ka ri bad namar ki polisi jong u bad ki skhim, ka ïoh ka kot ka la kiew sha ka kyrdan kaba san ha ka pyrthei ha kaba ïadei bad ka jingheh.
“Kaei kaba khlem lah ban pyndep ha ki 65 snem, ka India hapoh ka jingïalam u Myntri Rangbahduh ka la lah ban pyndep ha ki khyndai snem. Ka India shen kan sa long kaba lai ha ka jingheh ka ïoh ka kot ha pyrthei, hadien ka US bad China,” u la ong.
Haba kren shaphang ka jingkiew ka India ha ki kyrdan ka pyrthei, u Myntri u la ong, “Ngim donkam shuh ban leit sha kiwei kiwei ki ri ban pan jingïarap. Mynta, hapoh ka jingïalam u Myntri Rangbahduh, ka India ka la long kaba kham khlaiñ. Ngim randien namar ki jingtuklar kiwei kiwei ki ri ne ki kynhun pyntriem. Ki jubab kiba biang jong ngi ki la pynlong ïa ki ban pyrkhat arsien hashwa ban thmu ïa kino kino ki jingthombor pyrshah ïa ngi.”
U Myntri u la wan poi ha Agartala ha ka 5 tarik ha ka jingwan jngoh kaba lai sngi jong u ïa ka jylla Tripura ha kaba u la ïakynduh ïa ki kynhun bapher bapher bad peit bniah ïa ki sienjam ban kyntiew ïa ki sap treikam ha ka jylla bad ai jingkren sha ki paidbah ha kaba ïadei bad ki jingïasoh sha ki iew, ka jingpyntbit ïa ki briew bad ki lad ïoh kam ïoh jam.
Nyngkong, u la leit jngoh ïa ka Teliamura Sub Division, hajan Krishnapur bad u Sourav Das, DCM u la ai jingtip shaphang ka pule puthi bad ki lad kyntiew ïa ki sap treikam. U la thung ruh ïa u tynrai dieng hakhmat ka shlem trei kam jong u DCM. U Myntri u la ïakynduh ïa u Myntri ba dei khmih ïa ka tnat Tribal Welfare, Handloom, Handicrafts & Sericulture bad Statistics jong ka jylla Tripura, u Bikas Debbarma bad ïamir jingmut halor ki jingeh bad ki lad ki lynti kiba don ha ka jylla ha kaba ïadei bad ki bynta bapher bapher.
Hadien kane u Myntri u leitphai biang sha Agartala bad un leit jngoh ïa ka Vikas Tirth – ka projek rel Agartala – Bangladesh, bad kiwei kiwei ki kam.
Kane kalong ka sien kaba ar jong ka jingwan u Rajeev Chandrasekhar sha Tripura hadien ka jingïoh Myntri ha ka kynhun Myntri jong u Myntri Rangbahduh. Ka sien kaba khatduh ba u la wan sha kane ka jylla ka dei ha u Nailar 2022 bad u la ïashim bynta ha ka rynsan ïaid paidbah ‘Tiranga’.
