Srinagar, Jylliew:
Ki pulit ha ka sngi Ba-ar ki la pynshisha ba ki la kem ïa saw ngut ki nongkhaïi drok bad ïoh ruh ban kurup ïa u drok na ki ha Baramulla distrik kaba don ha Jammu&Kashmir.
Ki pulit ki la ïathuh ba lai ngut ki nongkhaïi drok napdeng kine kiba la shahkem ki dei kiba la tip kyrteng kum u Shafeeq Ahmad Naikoo, Yasir Ahmad Lone bad u Fayaz Ahmad Wani, kine ki dei ki nongshong shnong jong ka Dangerpora Sheeri, ki la shahkem ha ka por ba ka la don ka jingkhmih bniah ïa ki kali ha Dangerpora Market.
Kine ki lai ngut ki la wan da ka kali ar shaka na Dangerpora bad poi sha Mallora bad haba ki la ïohi ïa ki pulit ba ki la pynlong ïa ka jingkhmih bniah ki la pyrshang ban phet na katei ka jaka hynrei ki la shahkem noh na ka jingkhlaiñ ki bor pyntreikam jong ki pulit.
Ha ka por ba la pynlong ïa ka jingkhmih bniah, la ïoh ban kurup ïa ki jingsong kiba don ïa u Charas uba 170 gram na ki bad kine ki la shah rah ha ki pulit na ka bynta ka jingtohkit.
Ka kali ar shaka kaba ki shong ka la shah kurup noh ha ki pulit. Sa uwei pat u nongkhaïi drok u dei uba la tip kyrteng kum u Bilal Ahmad Shah uba dei u nongshong shnong jong ka Kalsari Pattan, une u la shahkem ha ka por ba ka la don ka jingkhmih bniah ïa ki kali ha Nehalpora Cheksari Pattan.
Une uba la shah kynnoh u la wan na ki bynta jong ka Checksari ban leit sha Pattan bad haba u la ïohi ïa ka kynhun jong ki pulit u la pyrshang ban phet na katei ka jaka, hynrei u la shahkem noh hadien ka jingkhang kdong jong ki pulit.
Ha ka por ba la pynlong ïa ka jingkhmih bniah na u, la lap ïa ka song jong u Cannabis Powder uba don ka jingkhia kaba 70 grams bad 5 kilo ki dieng syntiew Poppy, ïa kine baroh la kurup noh bad la rah ïa u na ka bynta ka jingtohkit, la ïathuh ki pulit.
Ka la don ka jingbuh jingmudui hapoh ka Narcotic Drugs and Phototrophic Substances (NDPS) Act ha ka jaka treikam jong ki pulit bad ka jingtohkit ha kaba ïadei bad kane ka la ïaid shakhmat, la bynrap shuh shuh ki pulit. Ka jingpyntreikam ïa ka jingkhmih bniah bad ka jingtohkit ïa kine kiba la shahkem ka dang ïai bteng.
