Bhubaneswar, Jylliew:
Ka sorkar Odisha ha ka sngi Ba-ar ka la khmih bniah biang ïa ka jingdon jong ki briew kiba la ïap na ka jingïatyngkhuh ki rel ha Balasore ha kaba ka la ong ba haduh mynta ka jingdon jong ki briew kiba la ïap na katei ka jingjia ka la kiew sha ka 288 ngut.
Ha ka jingïakren bad ki nongthoh khubor, u Chief Secretary PK Jena u la ong, kumba ka long haduh ka sngi Ba-ar mynstep ka la kiew sha ka 278 ngut, ha kaba ka la ong ba ki la don shuh sa lai ngut ki briew kiba la khlad noh na ka daw ka jingmynsaw jur jong ki, u la ong ba kumba la pynbna la ong ba ka jingïap jong ki briew na ka jingjia ka la long 275 ngut haduh ka sngi U Blei, ha ka lah sngi U Blei da ka jingkhlad noh sa lai ngut ka la kiew sha ka 278 ngut, naba ïa ka jingdon jong ki briew kiba la ïap ha ka jingjia la ñiew biang arsien.
Na ka jingshim jingkheiñ biang la shem ba ka jingdon jong ki briew kiba la ïap na ka jingjia ka la kiew sha ka 288 ngut.
U Jena u la ong ba 205 tylli na ki 288 tylli ki metïap la lah ban ithuh bad don nongleit kam haduh mynta bad ïa kine la aiti sha ki bahaïing jong ki.
Kiba dang sah naba ym pat don nongleit kam ki la don 83 tylli, ïa kine ki metïap la buh ha AIIMS-Bhubaneswar bad ha kiwei pat ki jaka ai jingsumar khnang ban ailad ïa ki bahaïing ba kin leit kam ïa ki met jong ki, u la ong.
“Ngi la ïohpdiang ïa shibun ki jingkylli lyngba ki Helpline Number ba la pyllait da ka sorkar. Ngi la khmih lynti ba baroh ki metïap kiba dang sah kin sa shah ithuh bad shah kam ha ki bahaïing jong ki,” la ong u Jena.
U la ong ba ka sorkar jylla ka la bahkhlieh ban pynlut na ka bynta ban ai jingsumar ïa kito kiba la mynsaw ha ka jingjia bad na ka bynta ka jingpynkit ïa ki met ïap sha kylleng ki jaka.
Ha kaba ïadei bad kane, na ka liang u Myntri Rangbah ka jylla Naveen Patnaik u la mang da T. 1.95 klur ban ai jingïarap kum ka bailutksan sha ki longïing jong ki 39 ngut kiba la ïap ha ka jingjia kiba dei na Odisha.
Kumba la ïathuh ka sorkar, la ong ba T. 5 lak yn sa ai sha ki bahaïing jong kito ki lanot kiba la ïap ha ka jingjia.
Ïa ka pisa yn sa pynbiang na ka Chief Minister’s Relief Fund (CMRF).
