New Delhi, Risaw:
Ki bor pyniaid ki la pynbna ba la pynkynriah noh ïa ka jingleit jurip jong ka President Droupadi Murmu kaba ar sngi sha ka jylla Odisha kaba la dei ban long ha ka 28 tarik u Risaw bad la pynkynriah noh namar ka jingwan jong ka erïong kaba la sdang pyni dak na ki thaiñ rud duriaw jong ka Jylla bad kaba lah ruh ban nang jur ha kine ki taïew ban sa wan.
“Namar ka jingbym biang ka jinglong ka suiñbneng bad ki lad jingiada, la pynsangeh noh ïa ka jingleit jngoh jong ka President,” la ong u heh sorkar ha ka ophis jong u symbud myntri rangbah.
Ka President Murmu ka la pynbna ba kan leit ban jurip ïa ka Rairangpur bad ka District trai jongka- ka Mayurbhanj, kaba la pynbeit ban long ha ka 28 tarik bad ka 29 tarik jong une u Risaw.
Katkum ka jingiathuh jong ki bor pyniaid jong ka Mayurbhanj, la iathuh ba ïa ka prokram jongka, ym shym la pynsangeh, hynrei yn sa pynbeit biang ïa ka por jurip jongka.
“Mynta ka thmu ban leit jurip pat ïa ka Mayurbhanj ha ka 4 bad 5 tarik u Naiwieng,” la ong u heh sorkar.
La ong ba katei ka jing-at phyllung kaba la sdang khih phaloh ha ki bynta jong ka duriaw Bay of Bengal, la ithuh ruh ba kan sa nang jur sha ka eriong kaba khlaiñ bor bad ka lah ban wan lynshop ha ka step jong ka 28 tarik u Risaw hapdeng ki rud duriaw jong ka thaiñ Shatei jong ka Andhra Pradesh bad Shathie jong ka Odisha.
