Raipur, Jylliew:
Ki la don lai ngut ki shipai jong ka tnat Central Reserve Police Force (CRPF) kiba la mynsaw ha ka lah sngi U Blei hadien ka jingbthei jong u bom Improvised Explosive Device (IED) ïa uba la buh da ki lehnoh Naxal ha Bijapur distrik kaba don ha Chhattisgarh, la ïathuh ki heh pulit.
Kane ka jingjia ka la jia ha ka por 10.30 mynstep jong katei ka sngi hajan u lum Tekameta ka jaka kaba hap hapoh ka jingkhmih jong ki pulit ka Gangaloor, ha ka por ba ka kynhun ba la ïatreilang jong ka 85th bad 222nd Battalion jong ka tnat CRPF ka la mih ban leit pynlong ïa ka jingleit thwet lehnoh ha katei ka thaiñ na Pusnar Camp, ka jaka kaba jngai kumba 400 km na ka nongbah jong ka jylla ka Raipur, la ïathuh u heh jong ka tnat CRPF.
Katba ka kynhun shipai ka dang kerkut ïa katei ka thaiñ u bom IED u la bthei kynsan ha kaba ki la don lai ngut ki shipai kiba la mynsaw, la bynrap u heh ka tnat shipai. U Constable Amit Kirtaniya bad u Ripan Kumar Sahoo kiba dei jong ka kynhun 85th battalion jong ka tnat CRPF bad u Vishal Kumar jong ka 222nd Battalion ki la mynsaw ha ka jingbthei jong u bom, u la ong. Katba uwei napdeng jong ki u la kham shitom jur, ki arngut kiwei pat ki la shu mynsaw malu mala,” la ïathuh shuh shuh u heh shipai.
Hashwa ïa kine ki shipai kiba la mynsaw la pynkit sha ka Distrik Hospital kaba don ha Bijapur, la ïathuh u heh shipai, ha kaba u la bynrap shuh shuh da kaba ong ba ki la shah pynkit noh da ka liengsuiñ sha Raipur na ka bynta ban bteng ïa ka jingsumar. Ka jingleit thwet lehnoh ha katei ka thaiñ ka dang ïai bteng haduh ba la thoh ïa ka khubor, u la bynrap.
