Washington, Jylliew:
Uwei u runar uba la don 29 snem ka rta, u la shah kem noh ha ki pulit ka New Jersey halor ka jingdon kti jong u ban rahbor ia kawei ka khynnah 11 snem na surok jong ka New Jersey.
Ia utei u briew la ithuh kum u Raquan Folk bad la pynngat ia u hapoh ki kyndon pynkheiñ aiñ jong ka jingrah bor, ka jingthmu leh sniew ia ki khynnah bad ka jingthmu ban pynngat ia ki khynnah hapoh ki kam awria.
Katei ka khynnah ka la shah rahbor ha ka 30 tarik u Jymmang, ha ka por kumba 5:30 janmiet, katba katei ka khynnah ka dang iaid lyngba na katei ka surok ha kaba u Folk u la tan ia ka hapoh ka kali lieh bad rah ia ka sha Neptune Township bad ynda la poi ha katei ka jaka, u la bthah ia ka ban law lut ia ki jaiñ kiba ka phong baroh.
Dei ha katei ka por ba katei ka khynnah ka pynbiej da kaba ong ba ka kwah ban leit shabar bad u la pynhiar ia ka na kali bad ka la ioh ban phet da ka kjat nangta.
