Noida, Jylliew:
Ki 30 tylli ki Farmhouse kiba la shna beaiñ ha ki jaka ba ju shlei um jong ka wah Yamuna ki la shah pynpra noh ha ka Noida Authority ha ka sngi Ba-ar, la ïathuh ki heh ba dei khmih.
U Officer on Special Duty jong ka Authority u Prasun Dwivedi u la ong ba ki la don kumba 100 ngut ki heh ba dei khmih kiba la shah pyntreikam na ka bynta ban leit pynpra ïa kitei ki ïing kiba don ha ka thaiñ kaba heh kumba 10,000 sq metre. Ki heh jong ka Revenue Department, Irrigation Department bad ki pulit ka thaiñ ki la don bynta lang ha katei ka jingleit pynpra ïa kitei ki ïing, u la ong.
Kumba la antad, la ong ba ka dor jong katei ka jaka ha kaba la shna ïa kitei ki ïing ka la long T. 40 klur, la ong u heh sorkar. “Ka jingleit pynpra ïa kitei ki ïing ka la sdang naduh ka por 10 baje mynstep. Ki la don kumba 32 tylli ki Farmhouse ïa kiba la shna beaiñ bad kumba katto katne tylli kiba la shna beaiñ ha ka jaka ba ju jia ka jingshlei um na ka wah Yamuna ki la shah pynpra,” la ong u Dwivedi.
U la ong ba ïa ka jing-leit pynpra ïa kine ki ïing la leh da ka jingai hukum jong ka CEO jong ka Noida Authority ka Ritu Maheshwari bad kiba kum kine ki jingpyntreikam kin sa nang ïai bteng ha ki sngi ban wan ruh.
Ha kaba ïadei bad kane, ka Noida Authority ka la maham jur ïa ki riew paidbah ba kim dei ban thied ïa katei ka jaka ne kiwei pat ki jaka jong ka thaiñ ba ju wan ka jingshlei um na ki wah naba ïa kum kine ki jingshna la khang pyrshah.
